Според процената врз основа на 96 отсто од обработениот примерок, Студентската листа освоила 52,9 отсто од гласовите, а листата „Александар Вучиќ – Обединета Србија“ 38,8 отсто
Студентската листа освоила убедливо мнозинство на предвремените парламентарни избори во Србија, покажува конечната проекција на Центарот за слободни избори и демократија (ЦеСИД) и агенцијата Ипсос.
Според проекцијата, изработена врз основа на 96 отсто од обработениот примерок, Студентската листа добила 52,9 отсто од гласовите, што би ѝ обезбедило 140 од вкупно 250 пратенички места. Листата „Александар Вучиќ – Обединета Србија“ освоила 38,8 отсто, односно 103 мандати.
Со ваква распределба, Студентската листа би можела самостојно да формира влада, со 14 пратеници повеќе од потребното минимално мнозинство од 126.
Под изборниот праг останала листата „Ивица Дачиќ – Фактор на стабилност“, со 2,2 отсто од гласовите. Прагот не го поминале ниту „Европска Србија“ и „Автентична десница“.
Од малцинските листи, Сојузот на војводинските Унгарци би добил три мандати, Албанската коалиција два, а Санџачката демократска партија и СДА Санџак по еден. Проценетата излезност е 69,3 отсто. Станува збор за конечна проекција на ЦеСИД и Ипсос, а не за конечни официјални резултати на изборната комисија.
Изборниот исход вечерва прв го соопшти Александар Вучиќ со признанието дека СНС доживеала пораз.