Излезните анкети на „Маркет линкс“ и „Алфа рисрч“ предвидуваат тесна предност на актуелната претседателка Илијана Јотова пред ексслужбениот премиер Андреј Ѓуров, при излезеност од околу 21–22 отсто
Илијана Јотова освоила 32,2 отсто, а Андреј Ѓуров 31,6 отсто од гласовите во првиот круг од претседателските избори во Бугарија, покажува излезната анкета на „Маркет линкс“, објавена од бугарската телевизија БТВ. Разликата е само 0,6 процентни поени, а трет е Костадин Костадинов со околу 13 отсто.
Според агенцијата, излезеноста изнесува 21,03 отсто. Податоците се анкетни процени, а не официјални резултати од пребројувањето. Гласањето во Бугарија заврши во 20 часот по тамошното време (19 часот по македонско).
Излезната анкета на „Алфа рисрч“, исто така објавена од БТВ, покажува малку поголема предност за Јотова: 35,3 отсто за неа и кандидатот за потпретседател Кирил Влчев, наспроти 32,4 отсто за Ѓуров и Георги Кандев. Костадинов и Петар Волгин се трети со 12,6 отсто. Оваа агенција ја проценува излезеноста на 22,3 отсто.
Двете анкети упатуваат на втор круг на 1 ноември. За победа во првиот круг се потребни повеќе од половината важечки гласови, при учество на повеќе од половината запишани избирачи.
Право на глас имаа 6 590 000 граѓани, а учествуваа 27 кандидатски двојки.