Од партијата прашуваат дали Зоран Заев и Венко Филипче, уценети од бугарскиот премиер Румен Радев, ургирале кај доктор Иван Барбов да постави дијагноза и да го изготви извештајот, во кој е наведено дека методите за лекување на Михаилова не се изведуваат во земјава, а поради тоа се препорачува нејзино лекување во Бугарија или во Турција
Владејачката ВМРО-ДПМНЕ бара по допрен глас да се истражи дали зад бегството на Ива Михаилова во Бугарија стојат актуелниот и поранешниот лидер на СДСМ, Венко Филипче и Зоран Заев.
Ваквото обвинување партијата го темели на, како што вели, фактот дека медицинскиот извештај на Михаилова, со кој се тврди дека методата за нејзино лекување ја нема во земјава, го изготвил докторот Иван Барбов, кој во времето на СДСМ бил директор на Клиниката за неврологија, а на функцијата бил поставен лично од Заев и Филипче во 2017 година. Во медицинскиот извештај стои дека методите за лекување на Михаилова не се изведуваат во земјава, а поради тоа се препорачува нејзино лекување во Бугарија или во Турција.
„Докторот Барбов не е непознат за македонската јавност. Тој е правосилно осудено лице за криминалниот случај ‘Метастаза’, каде тој е еден од обвинетите кој се гонел за посредување во издавањето на инвалидски пензии. Според тогаш објавените информации, Барбов и останатите наплаќале од 1 500 до 4 000 евра за барател, со цел нелегално издавање на инвалидски пензии, каде што за двете години додека дејствувала групата, заработиле 165 000 евра, но и за 53 000 евра го оштетиле Фондот за здравство“,
велат од ВМРО-ДПМНЕ.
Ова, според партијата, е доволно за да се постави прашањето дали Заев и Филипче, уценети од бугарскиот премиер Румен Радев, ургирале кај Барбов да постави дијагноза и да го изготви ваквиот извештај.
„СДС, Филипче и Заев има за што да дадат одговори и тоа треба да го направат во најкус можен рок, јавноста очекува одговори. Воедно, очекуваме и истрага по допрен глас за да се испита нашиот и сомнежот на јавноста дека во овој случај, преку нивниот доктор Барбов имаат вмешано прсти Филипче и Заев и дека зад целата операција стојат Радев и бугарската држава“,
додаваат од ВМРО-ДПМНЕ.