Претседателката на ЕК го советувала премиерот, министерот за надворешни работи да побара билатерална средба со шефицата на бугарската дипломатија за време на министерскиот состанок закажан идниот четврток во Софија
За време на заедничката прес-конференција со премиерот Христијан Мицкоски, претседателката на Европската комисија рече дека Северна Македонија ќе биде пречекана во Европската Унија со својот идентитет и јазик. Изрази уверување и дека македонската култура и македонскиот јазик можат да ја направат Унијата побогата
Ќе ѝ посакаме добре дојде на Северна Македонија со нејзиниот идентитет и со нејзиниот јазик. Веруваме дека македонската култура и македонскиот јазик можат да ја направат нашата Унија побогата. Ова е една од пораките што денеска од Скопје ги испрати претседателката на Европската комисија, Урсула фон дер Лајен, по средбата со премиерот Христијан Мицкоски. Таа ова го кажа велејќи дека земјава ѝ припаѓа на Европската Унија.
Шефицата на ЕК порача дека усвојувањето на уставните измени и натаму останува следниот чекор што земјава треба да го преземе за да се придвижи на својот евроинтегративен пат.
„Со многу труд и посветеност, пристапните преговори почнаа во 2022 година, скринингот беше завршен за помалку од една година и сега има само еден клучен чекор кој треба да го направите за да се придвижите напред и да го отворите првиот кластер. Знам колку е ова чувствително, но сакам да бидам јасна околу она за што се залага ЕУ. Ќе ѝ посакаме добредојде на Северна Македонија со нејзиниот идентитет и со нејзиниот јазик. Веруваме дека македонската култура и македонскиот јазик можат да ја направат нашата Унија побогата затоа што нашето мото е различност и обединетост и ние сме мошне сериозни по тоа прашање“,
порача Фон дер Лајен на денешната прес-конференција.
Оцени дека земјава повеќепати покажала оти може да носи храбри одлуки за својата иднина.
Во одговор на новинарски прашања, таа се осврна и на барањето на земјава за вклучување на ЕУ во разговорите со Софија – тема на која разговарала на денешната средба со премиерот Мицкоски.
„Се договоривме да имаме прв нов чекор следната недела и да се обидеме да го деблокираме процесот, односно да го претвориме во процес, тоа е најважниот дел“,
рече Фон дер Лајен.
На оваа тема се осврна и премиерот Мицкоски. Рече дека шефицата на Европската комисија го советувала, за време на посетата на министерот за надворешни работи Тимчо Муцунски на Софија следната недела, да побара билатерална средба со својата колешка Велислава Петрова-Чамова.
„Јас веднаш побарав од министерот да испрати дипломатска нота и да побара време за средба и состанок со неговата колешка и да почнеме процесот од некаде да го движиме“,
рече Мицкоски на денешната прес-конференција со шефицата на ЕК.
Фон дер Лајен порача дека во моментот кога процесот ќе се деблокира, Европската Унија ќе може да даде патоказ за натамошниот пат на земјава кон ЕУ, како што тоа сега го стори за дел од земјите кандидати.
„Во моментот кога ќе ја деблокираме ситуацијата тука, моето лично мислење е дека можеме да бидеме мошне брзи со Северна Македонија затоа што веќе интензивно работиме на реформите кои се неопходни. Да, сè уште има работа, но импресивно е она што досега го имате направено. Сега се фокусираме да ја деблокираме ситуацијата за да можеме да дојдеме со патоказ и во Северна Македонија“,
рече шефицата на ЕК.