Според социјалдемократите, величањето на човек осуден за геноцидот во Сребреница од министер во Владата предводена од премиерот Христијан Мицкоски, не е личен став, туку директна порака дека во извршната власт во земјава има место за оние кои ги слават воените злосторници од најмрачните страници на балканската историја
„Овие не зборуваат за историја. Тие романтизираат личност осудена за некои од најтешките злосторства извршени во Европа по Втората светска војна. И прашањето е едноставно: Каде е Влен? Каде се оние кои ни зборуваа за Охридскиот мировен договор, за почитување на заедниците, за нивните права и за едно рамноправно општество?“, се вели во реакцијата од ДУИ
Сликовита објава на својот профил на Инстаграм по истиот повод има и директорот на Агенцијата за остварување на правата на заедниците, Далибор Китановиќ. Тој објави фото-композиција, очигледно креирана со вештачка интелигенција, на која Ратко Младиќ е прикажан заедно со личности од српската историја, меѓу кои и Дража Михајловиќ, а со големи букви е напишано: „Генерални на небеската војска“
Смртта на поранешниот командант на главниот штаб на војската на Република Српска и осуден воен злосторник разбранува дел од политичките актери во земјава.
Опозициските СДСМ и ДУИ упатија остри реакции откако на фејсбук-страницата на Демократската партија на Србите во Македонија, чиј претседател е актуелниот министер за локална самоуправа во Владата, Иван Стоилковиќ, беше објавен текст во кој се глорифицира ликот на осудениот воен злосторник, кој почина вчера во Хаг.
Во текстот по повод смртта на Ратко Младиќ, напишан на српски јазик, се наведува дека тој бил војник, генерал и човек, кој целиот свој живот го ставил во служба на војската и на народот на кој припаѓа.
Остро осудувајќи го овој чин, од опозицискиот Социјалдемократски сојуз на Македонија директно го прозваа министерот Стоилковиќ, наведувајќи дека довчерашниот вицепремиер во Владата на Северна Македонија денеска јасно покажал кои се неговите вредности.
„За него босанскиот српски лидер Ратко Младиќ – осуден за геноцид, воени злосторства и злосторства против човештвото е величина и херој. За него тој е ‘негов генерал’ – среде Македонија. Ова е дел од поширока агенда: (Александар) Вучиќ, руска агенда, кинески инвестиции, воодушевување од Кина… ‘Српскиот свет’ сега и во форма на почитување на воениот злосторник“,
велат од СДСМ.
Оттаму посочуваат дека наместо да гледаме кон иднината, Европа и демократско и просперитетно општество, ние се враќаме во 1990-те години од минатиот век, во политиката на поранешниот српски претседател Слободан Милошевиќ и војните.
Според социјалдемократите, величањето на човек осуден за геноцидот во Сребреница од министер во Владата предводена од премниерот Христијан Мицкоски, не е личен став, туку директна порака дека во извршната власт во земјава има место за оние кои ги слават воените злосторници од најмрачните страници на балканската историја.
„СДСМ најостро го осудува овој чин. За вакви како Стоилковиќ нема место во ниту една демократска, европска и цивилизирана влада“,
порачуваат од Бихаќска.
Истовремено, оттаму го повикуваат премиерот Христијан Мицкоски да одговори дали ова е официјален став на неговата Влада или личен испад на неговиот министер, бидејќи, како што додаваат, граѓаните на Македонија не заслужуваат да имаат министер кој воениот злосторник го нарекува „мој генерал“.
Според Демократската унија за интеграција, станува збор за, како што велат, мега скандал, бидејќи партнер на Влен во Владата го глорифицира воениот злосторник Ратко Младиќ, со објавувањето на текст во кој се упатуваат пофалби за неговиот лик и дело.
Според интегративиците, во случајот не станува збор само за прашање од минатото, тука за криминален менталитет кој денес јавно се манифестира од страна на политички субјект кој е дел од власта. Во тој контекст, од опозициската партија упатуваат низа прашања кон Влен, обвинувајќи го политичкиот преставник на Албанците во земјава во власта, за молк и за двојни стандарди.
„Овие не зборуваат за историја. Тие романтизираат личност осудена за некои од најтешките злосторства извршени во Европа по Втората светска војна. И прашањето е едноставно: Каде е Влен? Каде се оние кои ни зборуваа за Охридскиот мировен договор, за почитување на заедниците, за нивните права и за едно рамноправно општество? Влен нè доведе до оваа точка, каде што нивните владини партнери денес јавно жалат и глорифицираат личност осудена за злосторства извршени токму врз заедниците и цивилите. Ова е двојниот стандард на Влен. За албанското национално знаме се плашат да го подигнат на своите собири, додека за глорифицирањето на воени злосторници од страна на нивните владини партнери не се осмелуваат да кажат ниту еден збор“,
се вели во реакцијата од ДУИ.
Оттаму сметаат дека Влен сноси политичка одговорност за овој чин на партнерот во власта и бараат разрешување на нивните министри во Владата, затоа што наместо промените што ги ветувале, носат понижувања кои ги кријат зад паролите за интеграција, рамноправност и права на заедниците.
„Една опција како Влен, која прифаќа да биде марионета на политика со носталгија кон проектите од минатото, отворајќи му пат на продорот на концептот на ‘Српскиот свет’ во институциите на Република Северна Македонија, повеќе не може да се крие зад паролите за интеграција, рамноправност и права на заедниците. Влен сноси политичка одговорност за ова. Партиите со ваков менталитет немаат место во управувањето со една мултиетничка и европска држава. Разрешување и заедно одете си дома! Не посрамотивте за фолелји“,
порачуваат од ДУИ.
Инаку, авторка на текстот, објавен на фејсбук-страницата на Демократската партија на Србите во Македонија, како што е наведено, е извесна Татјана Домазет. Кратка проверка на интернет покажува дека лице со ова име и презиме работи како библиотекар и стручен соработник во Народната библиотека на Србија во Белград.
Во текстот по повод смртта на Ратко Младиќ се наведува дека многу Срби го гледале како свој генерал во времето кога се рушеле држави, се раздвојувале семејства, се губеле животи и време во кое никој не можел да знае што ќе донесе следното утро.
„Многу Срби во тоа време го гледаа како свој генерал. Како човек кој стоеше пред нив кога беше најтешко. И затоа многумина ќе го паметат така. Не по Хаг. Не по ѕидовите на затворот. Не по последните години од неговиот живот. Туку по униформата, по генералот, по човекот кој претставуваше едно време и една борба за нив. Денес, кога сè тоа е зад него, останува необична тишина. Затоа што човекот може да помине години далеку од својата земја, но земјата што ја носи во своето срце не може да му биде одземена. Генералот го нема. А неговата приказна останува. И приказната за еден народ останува, со сета своја болка, страв, загуби, но и спомени кои нема да исчезнат само затоа што годините поминале… Затоа денес, од срцето на една Србинка, можам само да кажам: Генерале, почивај во мир. Времето ќе суди. Историјата ќе се сети. И ние ќе се сетиме“,
се наведува во текстот.
Инаку, објава на својот профил на Инстаграм по истиот повод има и актулениот директор на Агенцијата за остварување на правата на заедниците, Далибор Китановиќ.
Тој објави фото-композиција, очигледно креирана со вештачка интелигенција, на која е Ратко Младиќ е прикажан заедно со личности од српската историја, меѓу кои и Дража Михајловиќ, а со големи букви е напишано: „Генерални на небеската војска“.
