Вкупно дваесет и шест здруженија стојат зад иницијативата и предупредуваат оти владините одлуки за геолошки истражувања прекршуваат законски одредби и бараат итно запирање на постапките пред електронската аукција закажана за шести август
Дваесет и шест граѓански организации, иницијативи и платформи упатија итно барање до Владата за поништување или ставање вон сила на одлуките и јавните повици за доделување концесии за проспекциски геолошки истражувања на металични минерални суровини. Барањето се однесува на владините одлуки за просторот „Север–Североисток“ од декември 2025 година и за просторот „Исток“ од јуни 2026 година, како и на Јавниот повик 2/2026 и сите идни повици произлезени од нив.
Еден од главните аргументи на активистите е дека значителни делови од просторите предвидени со новите владини одлуки се преклопуваат со претходно истражени локации или постојни концесии, со што директно се прекршува членот 7-а (став 2) од Законот за минерални суровини. Овој член строго забранува проспекциски истражувања на веќе истражени простори, на локации за кои веќе се води постапка или на веќе доделени концесии.
„Министерството било должно пред доставувањето на предлогот до Владата точно да ги утврди границите и да ги исклучи сите законски забранети површини. Нивното вклучување во поширок концесиски полигон не е дозволено, ниту, пак, може да се исправи во подоцнежна фаза од постапката“,
децидни се од граѓанските организации.
Дополнително, тие бараат Владата и ресорното Министерство за енергетика, рударство и минерални суровини веднаш да ги запрат сите тековни активности во постапките, што подразбира итно стопирање на приемот и евалуацијата на понудите, како и откажување на електронската аукција која е закажана за 6 август оваа година.
„Одлуките опфаќаат 29 општини во источниот дел на државата. Во значителен дел од овие простори веќе биле спроведувани проспекциски геолошки истражувања или биле доделени концесии за детално истражување и експлоатација на металични минерални суровини. Според анализата на организациите, само од 2004 година наваму со различни видови концесии биле опфатени околу 100 проценти од териториите на Пробиштип, Делчево и Карбинци, 97 проценти од Пехчево, 94 проценти од Чешиново-Облешево, 89 проценти од Кратово, 87 проценти од Зрновци и Виница, 86 проценти од Радовиш, 85 проценти од Берово, итн“,
се вели во соопштението.
Поради наближувањето на роковите, од извршната власт се бара во рок од три работни дена писмено да ги извести граѓанските здруженија за преземените чекори.