Прашан која е пораката за Македонија од ЕУ во услови кога денеска четири држави кандидати отвораат и затвораат поглавја, рече дека се надева оти државата многу бргу ќе може да ги започне преговорите за пристапување
Се надевам дека денеска политичките партии ќе постигнат консензус за измените на Изборниот законик, вели евроамбасадорот во земјава Михалис Рокас.
„Јас навистина се надевам дека денеска, затоа што е последниот ден за постигнување консензус помеѓу политичките партии, компромисот ќе се постигне имајќи предвид дека политичките партии се среќаваат на дневна основа. Така што навистина се надевам дека и овој чекор од Реформската агенда – измените на Изборниот законик, ќе може да се постигне затоа што се работи за 4,2 милиони евра коишто би биле искористени за бенефит на граѓаните на оваа земја. Навистина се надевам дека консензусот ќе може да се постигне“,
изјави Рокас одговарајќи на новинарско прашање по промоција на возила за Државниот транспортен инспекторат набавени со донација од ЕУ.
Прашан која е пораката за Македонија од ЕУ во услови кога денеска четири држави кандидати отвораат и затвораат поглавја, рече дека се надева оти државата многу бргу ќе може да ги започне преговорите за пристапување.
„Пораката е јасна, процесот на проширувањето е инвестиција во безбедноста, сигурноста, просперитетот и конкурентноста на Европската Унија. И, како што гледате, тој процес се одвива многу бргу, за четирите земји процесот на проширување оди многу бргу. Искрено се надеваме дека Северна Македонија наскоро ќе може да го следи тој пат со цел да ги отвори пристапните преговори со ЕУ. Се надевам дека Македонија ќе може да го зграпчи тој моментум за да може да ги почне пристапните преговори“,
додаде Рокас.
Тој дополни дека се надева оти работите ќе можат да се придвижат напред.
„Веќе многу работа се прави зад радарот, зад погледите на јавноста, што не се гледа за да може да се завршат работите. Се надевам дека наскоро ќе се најде решение кое ќе го отвори патот за започнување преговори со ЕУ“,
рече Рокас.