„Мотивација за двете страни да ги решаваат отворените историски прашања“ – вака премиерот Зоран Заев ја разбира изјавата на бугарскиот претседател Румен Радев кој, како што пренесоа повеќе медиуми, побарал официјална Софија да постави јасни црвени линии кога е во прашање поддршката на Бугарија за евроинтеграциите на земјава.
„Верувам дека е можно употребата на овие зборови да значи мотивација за двете страни да ги надминуваат отворените прашања коишто во моментов се меѓу двете комисии за надминување на историските разлики. Верувам дека пораката е во тој дух. Секако верувам дека и претседателот Радев, но и премиерот Борисов неколку пати тоа јавно го докажува дека пријателството е нешто коешто е дадено, коешто се негува, расте и се унапредува и ние имаме обврска така да се однесуваме“,
изјави Заев.
Сепак тој посочи дека ќе треба да ја прочита изјавата на Радев и да се доинформира. За него Бугарија е стратешки партнер и верува дека, не само што ќе добиеме поддршка, туку Бугарија ќе продолжи да биде, како што ја нарече, авангардниот поддржувач на интегративни процеси на С. Македонија.заради тоа што е искрен и голем пријател. Заев смета дека истовремено нашата интеграција во НАТО и ЕУ е голем интерес и на Бугарија.
Бугарскиот претседател Радев изјави дека е должност на Бугарија да даде поддршка за Македонија, „но не безусловна и не безрезервна.“
„Мораме да бидеме искрени и јасни и да ги поставиме нашите црвени линии“,
рекол Радев.
Сепак тој посочил дека „раните не се зараснати и лични емоции не помагаат.“