Понтифот, како што пренесоа светските медиумите, во една од најјасните изјави на еден папа досега, ја отфрли теоријата за „праведна војна“, доктрина што црквата ја користи од петтиот век во својата оценка на глобалните конфликти
Своите апели до светските лидери папата ги упати во обемниот документ, познат како енциклика, насловен Magnifica humanitas (Величествено човештво), претставена во Синодната сала во Ватикан
Папата Лав XIV во својот прв теолошки документ објавен денеска ги повика владите во светот на регулација на системите за вештачка интелигенција (ВИ), предупредувајќи дека тие шират дезинформации, фаворизираат конфликти и се закануваат да го одведат светот во бескрајна војна, пренесе Ројтерс.
Своите апели до светските лидери папата ги упати во обемниот документ, познат како енциклика, насловен Magnifica humanitas (Величествено човештво), претставена во Синодната сала во Ватикан.
Првиот папа, кој доаѓа од Соединетите Американски Држави (САД), во однос на главната тема на документот, повика дека сопствеништвото врз податоците од вештачката интелигенција не смее да остане во рацете на само неколку луѓе, туку дека креаторите на политики треба да ги заштитат правата на работниците и децата од технологијата, како и дека е потребно ублажување на конкуренцијата меѓу компаниите кои развиваат ваков вид висока технологија.
Во таа насока, тој повика на цврсти законски рамки, независен надзор, информирани корисници и политички систем кој не ги избегнува своите одговорности.
Инаку, енцикликите, се една од највисоките форми на папско учење, кое се упатува до 1,4 милијарди членови на Римократоличката црква. Долгоочекуваниот текст, објавен денеска содржи речиси 43 000 зборови, а, како што пренесува Ројтерс, се подготвувал уште од изборот на Лав XIV пред нешто повеќе од една година.
Во документот, кој се фокусира на вештачката интелигенција, папата, исто така, ги осуди многуте војни што го тресат светот, се пожали на слабеењето на мултилатералните организации и предупреди дека профитот на воената индустрија е движечка сила зад конфликтите.
„Изминатите 60 години беа обележани со конфликти со зачудувачка бруталност, честопати погодувајќи ги цивилите во огромни размери. Човештвото се движи во насилна култура на моќ, каде мирот повеќе не се појавува како одговорност што треба да се преземе, туку како кревок интервал помеѓу конфликтите“,
рече поглаварот на Римокатоличката црква.
Понтифот, како што наведуваат светските медиумите, даде една од најјасните изјави на еден папа досега, а во која ја отфрла теоријата за „праведна војна“, доктрина што црквата ја користи од петтиот век во својата оценка на глобалните конфликти.
На оваа доктрина, која генерално наведува дека војните треба да се водат само за одбрана од агресија, се повикаа и претставници на администрацијата на американскиот претседател Доналд Трамп, меѓу кои и потпретседателот на САД, Џеј-Ди Венс, кој е католик, во оправдувањето на војната со Иран.
„Теоријата за ‘праведна војна’, која премногу често се користеше за оправдување на каков било вид војна, сега е застарена“,
рече папата, дополнително изразувајќи загриженост дека лидерите можат да започната војна за да го одвлечат вниманието од домашните проблеми.
Папата нагласи дека секоја употреба на вештачка интелигенција во војувањето мора да биде предмет на најстрогите етички ограничувања и го нарече неприфатливо доверувањето на смртоносни одлуки на системи за вештачка интелигенција.
Развојот на вештачката интелигенција тој го спореди со времето на Индустриската револуција, цитирајќи учења на еден од своите претходници, папата Лав XIII, кој во својата позната енциклика од 1891 година повика на подобри услови и плати за работниците.
Папата, исто така, призна дека Католичката црква не го осудила силно ропството сè до 19 век и лично се извини за тоа.
„Тоа е рана во христијанската меморија и поради тоа во името на Црквата, искрено барам прошка“,
напиша тој во документот.
Лав посочи дека дека општеството мора да се соочи со клучните прашања за тоа како се развива вештачката интелигенција и општата насока на глобалното управување.
Осврнувајќи се на библиската приказна за Вавилонската кула, во која едно гордо човечко племе се обидело да изгради кула доволно висока за да стигне до небото, разгневувајќи го Бога, папата наведува дека приказната укажува на ризикот од секој потфат што се стреми да стигне до небото без Божји благослов.
„Со срце на овчар, ги молам сите да се откажат од изградбата на уште една Вавилонска кула и да ги здружат силите во градењето на општото добро“,
апелира понтифот.