Во постапката, како што се наведува, едниот правен субјект бил прикажан како формален конкурент и доставил понуда со намерна техничка грешка и нереален паричен износ, со што им било оневозможено понатамошно наддавање на останатите учесници
Управата за финансиска полиција поднесе кривична пријава до Основното јавно обвинителство Скопје против седум лица и два правни субјекти, под сомнение за злоупотреби при јавна набавка за продажба на хаварисани возила како старо железо.
Според наодите на Финансиската полиција, двајца управители на правни лица (Н.И. и Б.Г.) во текот на 2021 година дејствувале координирано за да ја нарушат конкуренцијата.
Во постапката, како што се наведува, едниот правен субјект бил прикажан како формален конкурент и доставил понуда со намерна техничка грешка и нереален паричен износ, со што им било оневозможено понатамошно наддавање на останатите учесници.
Истрагата открива дека во шемата биле вклучени и пет вработени во Агенцијата за управување со одземен имот. Тројца членови на комисијата (Г.А., П.К. и Ф.Ј.), наместо да ги следат одредбите од Законот за управување со конфискуван имот, имотна корист и одземени предмети, се потпреле на правно мислење од нивниот колега А.Б.
Со ваквото постапување, тие свесно овозможиле склучување договор за продажба на одземени хаварисани возила како старо железо помеѓу Агенцијата за управување со одземен имот, претставувана од Ф.А., и правниот субјект управуван од Н.И.
Од Финансиската полиција велат дека преку оваа шема на правниот субјект му било овозможено да се стекне со противправна имотна корист во износ од 2 128 352 денари.
Од Управата за финансиска полиција соопштуваат дека случајот е доставен до надлежното јавно обвинителство за понатамошно постапување.