„Две години ништо не се случува. Лови Христијан Мицкоски внатрешни предавници, мекотели и со некаков непристоен уличарски речник, каков што не користи ниту еден премиер. Ама мафијата доаѓа од улица, ете тоа е вистината“, вели лидерот на СДСМ
Македонскиот јазик е целосно признат во Фронтекс во 2022 година – првиот официјален договор во Европската Унија потпишан на чист македонски јазик, вели претседателот на СДСМ, Венко Филипче, по повод Денот на македонскиот јазик оценувајќи дека Христијан Мицкоски продолжува со својата стара кампања, намерно создавање паника и лажно бранење на идентитетот.
„Јазикот е целосно признат во Фронтекс во 2022 година – првиот официјален договор во ЕУ потпишан на чист македонски јазик, без фусноти, без објаснувања, без ѕвездички. Во Преспанскиот договор во 2018 година експлицитно е наведено дека македонскиот јазик е дел од јужнословенската група јазици и е признат уште во 1977 година од Обединетите нации. Во Европската Унија македонскиот јазик е официјално признат во Преговарачката рамка. Во Обединети нации и во сите други меѓународни организации и, секако, билатерални договори. Македонскиот јазик не е на продажба и тој не е никако загрозен“,
рече Филипче на денешната прес-конференција.
Според него, премиерот Христијан Мицкоски продолжува со својата стара кампања, намерно создавање паника и лажно бранење на идентитетот.
„Зошто го прави тоа? Затоа што му треба изговор. Нема ниту една реформа, нема мерки за граѓаните, нема буквално ниту еден резултат. И во исто време кампања на медиумите под контрола на Орбан против СДСМ затоа што ние ги поддржуваме европските интеграции. Наративот повторно е ист. Предавници. Па сега кога граѓаните ќе го слушнат ова, нека се сетат на неговите ветувања дека ќе го укинеше Преспанскиот договор, дека ќе го враќаат името. Толку од предавниците и нивната кампања да се прикажат така. И затоа мора постојано да создаваат вештачки проблеми, да го блокираат европскиот пат и да ја претворат Македонија во слепо црево на Балканот. Најновиот пример, метежот на границите со новата мерка од Европската Унија“,
рече Филипче.
Според него, наместо Министерството за надворешни работи да се обиде да го реши проблемот за луѓето што патуваат надвор, премиерот порачува – летувајте во Македонија на нашите езера и планини.
„Исто како што лажеа за камионџиите, сè е решено. Па сега тоа го прават и за сите граѓани. Министерот разговарал со некаков оддел и толку. Толку за сериозна европска политика. Премиерот не решава проблеми, тој ги создава. Македонскиот јазик и идентитет никако и од никого не се загрозени. Сè уште не е формирана влада во Бугарија, а Мицкоски веќе најави заострување на односите и дека немало да има напредок. И затоа почна нова кампања за создавање вештачки конфликт со Бугарија за да може потоа да објасни дека нема напредок во европските интеграции поради Бугарите, а не поради неговата неспособност и одбивањето да ги исполни реформите“,
рече тој додавајќи дека за две години нема решено ниту една точка од реформската агенда.
Филипче истакна оти не е решена ниту првата и клучна точка, а тоа е внесувањето на малцинствата во Уставот и потсети оти премиерот вели дека нема отстапки ни милиметар.
„Малцинствата во Уставот не се бугарско прашање. Тие се европско прашање. Затоа што не се внесуваат само Бугарите, се внесуваат и други малцинства. И сето тоа се елементи за правење намерен конфликт за да не продолжат реформите и да не продолжи интеграцијата“,
додаде Филипче.
На новинарско прашање како ќе го коментира официјалниот став на Бугарија дека пред 1944 година не постоеле македонски јазик и нација, тој одговори дека поради нечии размислувања, не треба да се чувствуваме поинаку.
„Како вие се чувствувате како Македонец? Како Бугарија ви го загрозила идентитетот? Еве, кажете како ви го загрозила. Дали вие поради нечии размислувања и така натаму се чувствувате поинаку? Значи, ако има бугарско малцинство, сосема се разликува од македонскиот народ. Ако имаме договор потпишан на македонски јазик од сите земји членки на ЕУ, значи јазикот не е загрозен. Зашто не им ја оставиме историјата, нека ја дебатираат историчарите, ние да гледаме во иднината? Престанете со оваа пропаганда. Антиевропска е пропагандата, немојте да ја спроведувате пропагандата“,
рече тој.
Филипче вели дека секојдневно има нови проблеми и на ниту едно поле нема напредок.
„Две години ништо не се случува. Лови Христијан Мицкоски внатрешни предавници, мекотели и со некаков непристоен уличарски речник, каков што не користи ниту еден премиер. Ама мафијата доаѓа од улица, ете тоа е вистината“,
рече тој.
Според него, ако во меѓувреме се отворат преговорите и притоа ништо не е загрозено, и се дојде до европските фондови и продолжиме напред, натаму нека дебатираат историчарите.
„За некои работи не мора да се договориме. Меѓутоа, никој од Европа нема да дозволи блокирање на непринципиелна основа. Никој. И тогаш ќе седиме на европската маса со сите европски земји и тогаш сите ќе гледаат. Значи, не ширете пропаганда, оваа пропаганда да се идентификуваат внатрешни непријатели, надворешни непријатели е само за да се најде изговор од страна на премиерот за да нема напредок“,
оцени Филипче одговарајќи на новинарско прашање.