Контролите покажале дека 62 правни субјекти успешно го усогласиле своето работење, додека четири управители, од кои три во Скопје и еден во Струмица, останале без лиценци поради неправилности или недоставени податоци
Регулаторната комисија за домување (РКД) соопшти дека по извршена вонредна контрола, одземени се лиценците на четири правни субјекти кои вршат дејност управување со станбени згради.
Причината за оваа одлука е неисполнувањето на условите и законските обврски за усогласување на работењето со измените на Законот за домување.
Вонредната проверка била спроведена низ целата држава, опфаќајќи управители со седиште во Скопје, Охрид, Прилеп, Тетово, Гостивар, Струмица, Битола и други поголеми градови. Целта била да се провери дали фирмите се усогласиле со членот 42 од Законот за домување.
Контролите покажале дека 62 правни субјекти успешно го усогласиле своето работење, додека четири управители, од кои три во Скопје и еден во Струмица, останале без лиценци поради неправилности или недоставени податоци.
Претседателот на Регулаторната комисија, Никола Затуроски, појасни дека дел од казнетите субјекти веќе не биле активни на терен, додека други ги подмириле обврските кон станарите по одземањето на дозволата.
„Еден од управителите со одземена лиценца не извршувал дејности повеќе од шест месеци и со тоа свесно се откажал од управувањето. Две од фирмите, по одземањето на лиценците, комплетно ги завршија обврските – ги вратија средствата од резервниот фонд и изготвија завршни финансиски извештаи“,
вели Затуроски.
Според последните податоци на РКД, во државава вкупно 8 053 станбени згради се управувани од страна на управител или на заедница на сопственици. Со лиценцирани управители се 5 600 објекти, со договори за вршење управувачки услуги со вкупно 135 338 посебни делови, односно станови и деловни простории.
Податоците од Централниот регистар, пак, покажуваат дека до средината на декември минатата година има 2 453 активни регистрирани Заедници на сопственици.