На средбата, како што пишува, било разговарано за напредокот и за следните чекори во спроведувањето на реформската агенда
Реформската агенда повеќе не е само план на хартија, таа дава конкретни, мерливи резултати, напиша премиерот Христијан Мицкоски денеска на својот фејсбук-профил по средбата во Владата со амбасадорите од Европската Унија.
На средбата, како што пишува, било разговарано за напредокот и за следните чекори во спроведувањето на реформската агенда.
„Во изминатиот период го забрзавме спроведувањето во сите клучни области. Неколку чекори се веќе целосно реализирани, а други напредуваат побргу од планираното. Ова одразува силна политичка посветеност, подобрена институционална координација и јасен фокус на резултати“,
пишува Мицкоски.
Во јавните финансии, како што додава, ги зајакнуваме отчетноста и транспарентноста.
„Институциите повеќе известуваат, посистематски управуваат со ризиците и применуваат построги контроли врз јавната потрошувачка. Во исто време, го модернизираме буџетскиот систем и ги подобруваме планирањето и следењето на јавните инвестиции. Пораката е едноставна: јавните средства се управуваат поодговорно и поефикасно“,
посочува премиерот.
Овие реформи, додаде Мицкоски, не се изолирани активности. Тие се дел од поширока трансформација. Тие ја приближуваат нашата економија до единствениот пазар на ЕУ.
„Тие ги зајакнуваат институциите во согласност со европските стандарди, и носат конкретни резултати за граѓаните и бизнисите. Остануваме целосно усогласени со Европската Унија, политички, економски и стратешки“,
додава Мицкоски.
За средбата со амбасадорите информира и министерот за надворешни работи и надворешна трговија Тимчо Муцунски кој вели дека состанокот бил фокусиран на реформската агенда.
„Редовно координираме за да обезбедиме транспарентност и усогласување со партнерите од ЕУ. Повторно ја потврдивме нашата силна посветеност на спроведување со реформи во владеењето на правото, институционалната ефикасност и економската конкурентност“,
напиша Муцунски во објава на Икс.
Тој додава дека на состанокот ја нагласиле важноста на предвидлив и заслужен процес на пристапување како заеднички приоритет.
🇲🇰🇪🇺 Together with PM @MickoskiHM, we held a meeting with EU Resident Ambassadors focused on the reform agenda.
— Timco Mucunski (@TimcoMucunski) April 20, 2026
🔹 Regularly coordinating to ensure transparency and alignment with EU partners.
🔹 Reaffirmed our strong commitment to delivering reforms in rule of law,… pic.twitter.com/Jv2AsfzgRf