Блокадата, како што се наведува во објавата, ќе се спроведува непристрасно против бродовите на сите земји што влегуваат или излегуваат од иранските пристаништа и крајбрежните области, вклучувајќи ги сите ирански пристаништа во Арапскиот Залив и Оманскиот Залив
Американскиот претседател Доналд Трамп изјави дека САД ќе почнат да го блокираат Ормускиот Теснец во обид да ја преземат контролата врз стратешкиот воден пат од Иран по неуспешните мировни преговори што пред два дена се одржаа меѓу земјите во Пакистан.
Трамп, исто така, се закани дека ќе ги бомбардира иранските постројки за третман на вода, електраните и мостовите доколку Техеран не се согласи да се откаже од својата програма за нуклеарно оружје, што е клучна точка на сопнување меѓу двете страни, пишува „Гардијан“.
Најавата на Трамп за блокада доаѓа откако мировните преговори меѓу САД и Иран во Исламабад, кои траеја 21 час, завршија без да биде постигнат договор за завршување на конфликтот и за отворените прашања меѓу двете земји.
Џеј-Ди Венс, потпретседател и шеф на американскиот тим, рече дека Иран одбил да се откаже од можноста за развој на нуклеарно оружје, додека иранските делегати рекоа дека Вашингтон треба да направи повеќе за да ја добие нивната доверба.
Ризикувајќи уште едно зголемување на цените на нафтата, Трамп рече дека ѝ наложил на американската морнарица да започне со „блокирање на сите бродови што се обидуваат да влезат или да излезат од Ормускиот Теснец“ и го обвини Иран за изнуда со сопствена шема на наплата на патарини за танкери.
Централната команда на САД објави дека блокадата ќе започне денеска во 10 часот наутро по источно време (16 часот по македонско време).
Блокадата, како што се наведува во објавата, ќе се спроведува непристрасно против бродовите на сите земји што влегуваат или излегуваат од иранските пристаништа и крајбрежните области, вклучувајќи ги сите ирански пристаништа во Арапскиот Залив и Оманскиот Залив.
„Силите на Централната команда нема да ја попречуваат слободата на пловидба за бродовите што транзитираат низ Ормускиот Теснец до и од неиранските пристаништа“,
пишува во објавата.
Иранската револуционерна гарда одговори со изјава дека доколку некој воен брод се приближи до теснецот за да спроведе блокада – што обично се смета за воен чин – тоа ќе се смета за прекршување на сегашниот прекин на огнот и ќе биде строго решено. Тие инсистираат дека теснецот останува под иранска контрола.
Преговорите помеѓу САД и Иран во Исламабад, кои се сметаат за први на највисоко ниво од Исламската револуција во 1979 година, доаѓаат по повеќе од еден месец конфликт, кој започна со воздушни напади на Соединетите Држави и Израел врз Иран на 28 февруари. Како одговор, Иран испали балистички ракети кон неколку неутрални земји во Персискиот Залив и кон Израел, по што го затвори Ормускиот Теснец – еден од најзначајните нафтени коридори во светот.