Филипче обвинува дека секој сектор е погоден од промашените политики на власта и најави дека СДСМ во следниот период ќе предложи законски решенија за помош на земјоделците
Кризата ќе станува сè потешка, состојбата во земјоделството е алармантна, а Владата нема донесено ниту една антикризна мерка за помош на земјоделците, кажа лидерот на СДСМ, Венко Филипче, на денешната средба со земјоделци во неготинско Криволак.
Тој посочи дека поради високите цени на нафтата, драстично се зголемени цените на вештачките ѓубрива и сите трошоци што ги имаат земјоделците, што сериозно ја доведува во прашање одржливоста на земјоделското производство и егзистенцијата на земјоделците.
„Ситуацијата е навистина алармантна. Во овој период кога растат цените на нафтата, земјоделците се соочуваат со сериозни предизвици. Прво, по прашање на нивната егзистенција, како земјоделци и семејствата кои што преку земјоделството ги издржуваат. И второ, поради негрижата на власта за овој сектор мора да знаеме дека може да се соочиме со сериозен недостаток на производство на одредени земјоделски култури, посебно житарки. Тоа значи дека во следниот период може да се соочуваме со дополнителен раст и на цената на лебот до крајот на годината“,
рече Филипче.
Првиот човек на СДСМ обвинува дека секој сектор е погоден од промашените политики на власта и најави дека СДСМ во следниот период ќе предложи законски решенија за помош на земјоделците.
„Ниски субвенции, ниска откупна цена на килограм произведено грозје. Сега нема никаква најава дека црните грозја, од сортите на црните грозја, ќе се откупуваат. Ниска субвенција и неисплатена за сточарите, висока производна цена поради висока цена на работната рака, водата, ѓубривата. Сѐ на се сметам дека оваа ситуација треба да биде сериозен аларм. Ние во следниот период, имајќи ги предвид нивните барања ќе предложиме неколку предлог закони, како што тоа го направивме лани, што за жал власта го одбија,а тоа беше за зголемена откупна цена по килограм грозје“,
рече Филипче.
Инаку, Владата денеска претпладне одржа итна вонредна седница на која донесе одлуки во врска со амортизирање на цените горивата, кои поради кризата со протокот на енергенти од Блискиот Исток бележат дисторзии и во нашата државата.