„Партнерството со Унгарија не е формално, туку суштинско и засновано на доверба, заеднички вредности и конкретна соработка. Двете земји градат стратешки сојуз насочен кон економски развој, политичка поддршка и заедничко справување со предизвиците на современото време“, рекол македонскиот премиер
Премиерот Христијан Мицкоски, во рамки на официјалната посета на Унгарија, остварил средба со неговиот унгарски колега Виктор Орбан, на која било потврдено продлабочувањето на стратешкото партнерство меѓу двете држави. Главниот акцент на разговорите бил ставен на создавање услови за нови инвестиции, зголемена трговска размена и реализација на конкретни економски проекти.
Двајцата премиери дискутирале за регионалната стабилност, инфраструктурна поврзаност, енергетска стабилност.
На средбата била потенцирана и важноста на поддршката што нашата држава ја добива од Унгарија во контекст на европската перспектива, при што било нагласено дека интеграцијата треба да се темели на принципиелност и мерит-систем.
Во рамки на посетата, Мицкоски се обратил и на настан во организација на „Mathias Corvinus Collegium“, каде што говорел за значењето на лидерството, визијата и храброста во време на сериозни европски и глобални предизвици. Тој истакна дека силните држави се градат врз јасни политики, стабилни институции и доследна заштита на националните интереси потенцирајќи оти Унгарија претставува пример за држава која со јасна визија и силно лидерство успева да обезбеди економски развој, стабилност и зачувување на идентитетот.
„Партнерството со Унгарија не е формално, туку суштинско и засновано на доверба, заеднички вредности и конкретна соработка. Двете земји градат стратешки сојуз насочен кон економски развој, политичка поддршка и заедничко справување со предизвиците на современото време“,
рекол Мицкоски.
Претходно премиерот Мицкоски имаше обраќање на бизнис-форумот на тема „Ден на деловна соработка помеѓу Унгарија и Македонија“. Мицкоски истакнал дека Владата спроведува политики насочени кон создавање стабилна, предвидлива и конкурентна деловна средина.
Мицкоски упатил и порака до деловната заедница дека Македонија е отворена за инвестиции и партнерства, нудејќи поволни услови, стратешка географска позиција и квалификувана работна сила. Тој ги охрабрил унгарските компании да ги разгледаат можностите за инвестирање во земјата, но истовремено потенцира дека македонските компании се подготвени да ги прошират своите активности и на унгарскиот пазар.