Уште во август минатата година, пред локалните избори, вели дека формално регистрирал нова политичка партија, која ќе продолжи да функционира како резервна опција доколку судскиот процес за Алијанса на Албанците не заврши во негова корист. Упати повик до пратениците што ја поддржуваат неговата политичка линија да му се приклучат
Пратеникот и доскорешен претседател на крило на Алијансата за Албанците (АА), Зијадин Села, очекува повисокиот Апелациски суд да одлучи во корист на, како што рече, вистинската Алијанса за Албанците (АА), предводена од него, во судскиот спор за легитимното раководство на партијата.
Како алтернатива, како што рече, веќе има формирано нова политичка партија доколку правниот процес не заврши во негова полза.
На денешната прес-конференција во Собранието, тој потврди дека по две претходни одлуки на Основниот суд во Тетово, случајот е во постапка пред Апелацискиот суд во Гостивар. Сепак, нагласи дека сите одлуки донесени во корист на другото крило на АА ќе бидат обжалени и дека очекува исправка во повисоките судски инстанци.
„Нормално дека ќе ја обжалиме одлуката. Жалбата е поднесена во Апелација. Очекувам судот да ја утврди вистинската состојба во согласност со статутот и одлуките на органите на партијата“,
рече тој.
Според него, во 2024 година делегатите на конгресот со мнозинство го разрешиле Арбен Таравари, а одлуките се потпишани и приложени во судска постапка.
Уште во август минатата година, пред локалните избори, вели дека формално регистрирал нова политичка партија – Албански сојуз, која ќе продолжи да функционира како резервна опција доколку судскиот процес за Алијанса на Албанците не заврши во негова корист.
„Ако процесот не оди во наша полза, продолжуваме со политичката партија што веќе ја формиравме“,
вели Села и упати повик до пратениците што ја поддржуваат неговата политичка линија да му се приклучат.
Крилото на Алијанса за Албанците (АА) предводено од Зијадин Села беше дел од коалицијата „Европскиот фронт“, предводена од Демократската унија за интеграција (ДУИ), која потоа се преименува во „Национална алијанса за интеграција“ (НАИ).
Во декември минатата година, на состанокот на претседателството на партијата, крилото на Села одлучи да ја напушти коалицијата НАИ, а нејзините пратеници во Собранието да дејствуваат како независна група.