Во извештајот од Катастар се вели дека биле регистрирани 23 470 купопродажби, што претставува раст од четири отсто. Зголемување имало и кај закупите, и тоа за 17 отсто во однос на претходната година
Пазарот на недвижности во изминатата 2025 година остана стабилен и атрактивен за инвеститорите, покажува најновиот годишен извештај на Агенцијата за катастар на недвижности. Вкупната вредност на пазарот е 1,14 милијарди евра, што е раст од 12,9 отсто во споредба со претходната година.
Лани секторот недвижности имал вкупно 33 381 реализирани трансакции, што претставува раст од 7,6 отсто во споредба со 2024 година.
Во извештајот од Катастар се вели дека биле регистрирани 23 470 купопродажби, што претставува раст од четири отсто. Зголемување имало и кај закупите, и тоа за 17 отсто во однос на претходната година.
Најактивен период бил четвртиот квартал со промет од 314 милиони евра.
Иако бројот на продадени станови е во благ пад од 3,9 отсто, нивната вредност пораснала за 10,8 проценти. Становите учествуваат со речиси половина (48 отсто) од вкупната вредност на пазарот.
Најактивни општини биле Центар, Аеродром и Карпош каде становите се продавале по просечна цена од 1 692, 1 558 и 1 419 евра за квадратен метар.
Најскап стан лани бил продаден во Аеродром за 166 500 евра, а во оваа општина е постигната и највисока цена по квадрат – 3 784 евра за квадратен метар.
Најскапо продадени куќа и деловен простор биле во Општина Центар. За куќата биле платени 1,5 милиони евра, а за деловниот простор 6,8 милиони евра.
Анализата покажува дека пазарот е најразвиен во поголемите урбани центри. Најмногу трансакции се реализирани во Центар 2 414 трансакции, Аеродром 1 963 трансакциии, Карпош 1 791 трансакции.
Пазарот на новоградби е најдинамичен во Скопје, каде во Општина Центар е забележан скок на цените од инвеститор за дури 31 отсто додека во Охрид е забележан пад од 4 проценти.
Значаен раст на купопродажната вредност бележат куќите и градежното земјиште со 37 и 36 отсто, додека земјоделското земјиште и шумите учествуваат со 31 процент во вкупниот број на купопродажби.
Извештајот покажува и дека сè повеќе граѓани и фирми се одлучуваат за изнајмување. Вкупната месечна закупнина на ниво на држава изнесува 4 милиони евра. Најголем интерес има за станови кои се 35 отсто од закупите и тоа има раст од 15 проценти во однос на претходната година. Потоа следат деловни простори со 34 отсто и бележат раст на вкупната месечна закупнина од 24 проценти во споредба со лани.
Од Катастарот предвидуваат дека во 2026 година ќе продолжи трендот на умерен раст. Се очекува зголемен интерес за инвестиции и натамошен пораст на цените кај закупите.