„Историјата нè учи дека злото почнува со збор, со предрасуда, со рамнодушност, а завршува со трагедии што го потресуваат човештвото. Затоа денес, како држава и како општество, ја обновуваме нашата заклетва дека ќе ја чуваме вистината, ќе го негуваме сеќавањето и ќе ја браниме човечката достоинственост“, рече премиерот на одбележувањето на 83-годишнината од депортацијата на македонските Евреи
Сеќавањето е наша морална должност и таа вистина треба да ја браниме по секоја цена, а борбата против омразата е наша историска одговорност. Ова денеска го порача премиерот Христијан Мицкоски во своето обраќање по повод одбележувањето на 83-годишнината од депортацијата на 7 144 македонски Евреи во логорот „Треблинка“ пред споменикот во поранешниот скопски „Монопол“.
Премиерот посочи дека денеска стоиме во тишина и со длабока почит пред една од најболните страници во нашата историја и се сеќаваме на депортирањето на македонските Евреи, трагедија што засекогаш го одбележа нашето колективно паметење.
„Во март 1943 година, повеќе од седум илјади наши сограѓани, Евреи од Скопје, Битола и Штип беа насилно собрани, одземени од своите домови, од своите семејства, од својот живот. Тие беа депортирани во логорот на смртта, ‘Треблинка’, каде нивните животи беа сурово прекинати. Зад таа бројка стојат имиња, семејства, соништа, таленти и судбини. Стојат луѓе што биле дел од ткивото на нашите градови, од трговијата, од културата, од духот на Македонија. Со нивното исчезнување, нашата земја изгуби дел од својата душа“,
рече тој.
Според него, денеска не се сеќаваме само на трагедија, туку и на обврската за спречување на омразата, антисемитизмот, расизмот и нетолеранцијата во нашето општество.
„Историјата нè учи дека злото почнува со збор, со предрасуда, со рамнодушност, а завршува со трагедии што го потресуваат човештвото. Затоа денес, како држава и како општество, ја обновуваме нашата заклетва дека ќе ја чуваме вистината, ќе го негуваме сеќавањето и ќе ја браниме човечката достоинственост. Македонија е дом на различности, а нашата сила отсекогаш била во тоа што различните култури, религии и традиции живееле заедно, создавајќи заедничка иднина“,
кажа Мицкоски.
Еврејската заедница во земјава, како што рече, оставила неизбришлива трага во историјата на оваа земја, а нејзиниот придонес во културата, образованието, стопанството и општествениот живот е дел од нашето заедничко наследство.
„Нека споменот на депортираните македонски Евреи биде вечен. Нека нивната трагедија биде опомена за сите генерации што доаѓаат. Вечна им слава и вечен спомен“,
вели премиерот.
На комеморацијата на оддавање почит се обратија и претседателот на Еврејската заедница во Македонија, Пепо Леви, и германската амбасадорка во земјава Петра Дрекслер.