„Нормално, понекогаш тие одлуки се во согласност со вашите политики, понекогаш не се во согласност во вашите политики, но одлуките на Уставниот суд мора да се прифатат и да се имплементираат“, вели премиерот
Одлуката на Уставниот суд да ја прекине постапката за оценување на уставноста на линеарното зголемување на пензиите е во корист на пензионерите. Ова е коментарот што премиерот Христијан Мицкоски денеска го даде одговарајќи на новинарско прашање за вчерашната одлука на Уставен.
„Што се однесува до одлуката на Уставниот суд, многупати сум кажал дека нема да ги коментирам. Нормално, понекогаш тие одлуки се во согласност со вашите политики, понекогаш не се во согласност во вашите политики, но одлуките на Уставниот суд мора да се прифатат и да се имплементираат“,
рече Мицкоски.
Оваа одлука, вели премиерот Мицкоски, за среќа на пензионерите е во нивна полза и ќе остане линеарното покачување од 1 000 денари за секој пензионер.
„Со ова се заокружуваат 7 000 денари линеарно покачување на пензиите откако дојдовме како влада, иако ветивме зголемување од 5 000, веќе имаме 7 000 илјади денари. Тоа сега ќе се заокружи со мартовската пензија која ќе се исплати во април“,
додаде премиерот.
На вчерашната седница на Уставниот суд предлогот за оценување на уставноста на член 2 од измените на Законот за пензиско и инвалидско осигурување од 2025 година не добил мнозинство, со што актот останува во правниот поредок.
Постапката за оценување на уставноста на член 2 од измените на Законот за пензиско и инвалидско осигурување од 2025 година беше поведена затоа што, според Судот, линеарното зголемување на пензиите што тој го предвидува може да ја наруши уставната еднаквост, правото на сопственост и начелото на социјална сигурност, бидејќи еднакво ги третира пензионерите со различни придонеси и создава непропорционални ефекти.
Премиерот Христијан Мицкоски во ноември рече дека Судот веќе донел одлука за укинување на законската одредба за линеарно зголемување на пензиите, што ќе донесе најголемиот број од пензионерите да добиваат помали пензии.