По преземените мерки, како што велат од полицијата, Р. Б. бил пронајден во викенд-куќа во кичевското село Осломеј, од каде што бил лишен од слобода
Вработен во РЕК „Осломеј“ за да си оди порано од работа, ноќеска пријавил дека во комбинатот има поставено бомба. За случајот утринава информираа од Министерството за внатрешни работи (МВР), од каде што велат дека вработениот е задржан во полициска станица во Кичево.
Од МВР велат дека 44-годишниот Р. Б. од Кичево ноќеска во 2:25 часот му испратил порака на својот шеф со која го информирал дека има сознание оти во еден оддел во РЕК „Осломеј“ има поставена бомба.
По извршените проверки од страна на полициски екипи било утврдено дека станува збор за лажно пријавување и оти нема поставено бомба.
По преземените мерки, како што велат од полицијата, Р.Б. бил пронајден во викенд-куќа во кичевското село Осломеј, од каде што бил лишен од слобода.
Притоа, тој признал дека пријавата е лажна и оти го измислил целиот случај за да може порано да си замине од работа.
Од полицијата велат дека по целосно документирање на случајот, против кичевчанецот ќе биде поднесена соодветна пријава.