Информацијата ја соопшти Централната команда на војската на САД (ЦЕНТКОМ), која ги надгледува американските сили во регионот на Блискиот Исток
Американската војска соопшти дека погодила речиси 2 000 цели во Иран откако САД и Израел ја почнаа големата офанзива кон земјата во саботата наутро.
Информацијата ја соопшти Централната команда на војската на САД (ЦЕНТКОМ), која ги надгледува американските сили во регионот на Блискиот Исток.
„Нашата војска на Блискиот Исток презема операција без преседан за да ја елиминира опасноста што доаѓа од Иран по животите на Американците. Веќе погодивме речиси 2 000 цели, со повеќе од 2 000 парчиња муниција. Сериозно ја деградиравме иранската воздушна одбрана и уништивме стотици ирански балистички ракети, лансирани рампи и беспилотни летала“,
рече во видеообраќање адмиралот на Централната команда на војската на САД, Бред Купер.
Тој додава дека за помалку од 100 часа американската војска уништила и 17 ирански бродови, а меѓу нападнатите цели била и, како што вели, најоперативната подморница на Иран. Целта, како што наведува, е да се потопи целата иранска морнарица.
„Денес нема ниту еден ирански брод што плови во Арапскиот Залив (познат и како Персиски Залив или Заливот), Ормускиот Теснец или Оманскиот Залив“,
рече Купер, додавајќи дека Иран со децении го попречува меѓународниот поморски сообраќај.
Информациите од САД првично не можеа да бидат независно проверени. Соединетите Американски Држави и Израел започнаа офанзива од големи размери против Иран во саботата, што предизвикува регионална ескалација откако Техеран лансира ракети кон американските бази во неколку заливски држави и кон Израел.
Адмиралот на армијата на САД вели дека операцијата на вооружените сили на САД на Блискиот Исток е една од најголемите бидејќи вклучувала повеќе од 50 000 војници, 200 борбени авиони, два носачи на авиони и бомбардери, пренесе „Гардијан“.
Update from CENTCOM Commander on Operation Epic Fury: pic.twitter.com/epEohq64Vf
— U.S. Central Command (@CENTCOM) March 3, 2026
Според извештаите, Иран од своја страна лансирал над 500 балистички ракети и повеќе од 2 000 беспилотни летала врз земји од регионот и врз Израел.
Инаку, Иранската револуционерна гарда утрово соопшти дека го контролира Ормутскиот Теснец, витален превозен пат за нафта и гас, и дека сите бродови што сакаат да поминат низ водниот пат ризикуваат штета од ракети или залутани дронови, објави агенцијата Франс прес.
„Во моментов, Ормускиот Теснец е под целосна контрола на морнарицата на Исламската Република“,
изјави претставникот на морнарицата на гардата, Мохамед Акбарзаде, во соопштение објавено за новинската агенција Фарс.
Сепак, адмиралот Бред Купер од Централната команда на САД го поби тврдењето на Иран, велејќи дека само неколку часа претходно САД ја потопиле целата иранска морнарица и оти веќе уништиле 17 ирански бродови.
„Со децении иранскиот режим го вознемируваше меѓународниот бродски транспорт. Денес нема ниту еден ирански брод во Арапскиот Залив, Ормускиот Теснец или Оманскиот Залив“,
рече тој.
Американсиот претседател Доналд Трамп вчера изјави дека американската морнарица би можела да започне со придружба на танкери за нафта низ Ормускиот Теснец доколку е потребно. Овој чекор е во насока да се направи обид за стабилизација на цените на нафтата и гасот кои почнуваат да растат како последица на случувањата на Блискиот Исток.
Израелската војска утрово соопшти дека Иран лансирал нов бран одмазднички напади, поради што во последните неколку часа во Израел се огласиле звучните тревоги за предупредување од ракетни удари, пренесува Би-би-си.
Од израелската страна велат дека следеле и проектили лансирани од Либан, каде што силите на Тел Авив вчера извршија неколку напади врз цели на милитантната група Хезболах, која ја има поддршката на Иран. Според израелските одбранбени сили, ракетите и проектилите биле пресретнати и нема непосредни извештаи за евентуални жртви.
Во меѓувреме, Министерството за здравство на Кувајт соопштило дека единаесетгодишно девојче починало откако шрапнели од проектил паднале во станбена област во земјава. Четири члена на нејзиното семејство, меѓу кои и нејзината мајка, биле пренесени во болница.