Кризниот штаб, велат од Министерството, е достапен 24 часа дневно за сите потреби поврзани со помош, поддршка и асистенција на македонските државјани
Министерството за надворешни работи и надворешна трговија попладнево информира дека во рамките на институцијата е формиран кризен штаб кој, како што се наведува, континуирано ја следи состојбата со случувањата на Блискиот Исток по нападите што САД и Израел ги извршија врз Иран, а Техеран возврати со одмазнички удари кон американски цели во земји од регионот.
Кризниот штаб, велат од Министерството, е достапен 24 часа дневно за сите потреби поврзани со помош, поддршка и асистенција на македонските државјани.
Оттаму го повторуваат апелот до сите македонски државјани кои се наоѓаатр во погодените подрачја внимателно да ги следат официјалните известувања на надлежните институции и строго да постапуваат согласно безбедносните протоколи.
„Воедно, се препорачува одложување на сите ненеопходни патувања кон земјите од овој регион, сè до подоборување на безбедносната сосојба“,
велат од Министерството за надворешни работи и надворешна трговија.
Оттаму додаваат дека Министерството, со сите свои капацитети и преку дипломатско-конзуларните претставништва, останува целосно на располагање на македонските државјани и ќе предолжи навремено да ја информира јавноста за сите релеватни информации и понатамошни насоки.
„Ги потсетуваме нашите државјани дека во случај на потреба од помош или дополнителни информации можат да се обратат на следните контакти: Министерство за надворешни работи и надворешна трговија, Тел: +389 75 273 732 / +389 75 268 736 и Е-пошта: [email protected]“,
се наведува во соопштението.
Претходно, од ресорното Министерството соопштија дека до дипломатско-конзуларното преставништво во Тел Авив, единаесет македонски државјани официјално побарале евакуација од Израел.
Покрај преку амбасадата во Тел Авив, Министерството е во континуирана комуникација и е целосно на располагање на македонските државјани за потребна помош и координација и преку дипломатско-конзуларните преставништва во Доха (Катар) и Абу Даби (Обединетите Арапски Емирати).
Преку објава на социјалната платформа Икс, министерот за надворешни работи и надворешна трговија, Тимчо Муцунски, изрази јасна поддршка за сојузничката координација во, како што напиша тој, справувањето со дестабилизирачките закани на Блискиот Исток. Од друга страна, тој ги осуди контра нападите од Иран врз Израел и врз американските бази во регионот.
САД и Израел во заедничка акција денеска го нападнаа Иран. Американскиот претседател Доналд Трамп кажа дека започнале големи борбени операции во Иран и најави целосно уништување на нивната ракетна индустрија. Тој вели дека САД преземаат масовна операција за, како што посочи тој, да спречат оваа радикална диктатура да ја загрози Америка.
Нападите доаѓаат по третата рунда индиректни разговори за нуклеарната програма на Техеран, што пред два дена се одржаа во Женева, меѓу претставници на САД и Иран, а кои завршија без конкретен договор.
Техеран вели дека иако знаеле за намерите на САД и Израел за напад, сепак влегле во преговори за нуклеарната програма за да „демонстрираат нелегитимност на секој изговор за агресија“.