На новинарско прашање што би изгубила Владата со овој пристап (работодавачите да го покријат нето-зголемувањето, а Владата да ги покрие придонесите), министерката вели дека таа, а и буџетот не би изгубиле ништо, но не упати за ова да прашаме во Владата и во надлежното Министерството за економија и труд
Владата останува набљудувач во дијалогот меѓу синдидикатите и работадавачите бидејќи платите ги обезбедува приватниот сектор, вели министерката за финансии Гордана Димитриеска-Кочоска во интервју за „360 степени“ на МРТ 1. Според неа, има Закон за минимална плата каде се регулирани овие прашања и од тие причини, како што вели, Владата не се меша.
На прашање зошто Владата не се водеше од истата логика и за одлуката за зголемување на пензиите линеарно за пет илјади денари иако постоеше закон што предвидуваше како се прави усогласување, министерката одговори дека има разлика бидејќи пензиите биле предизборно ветување.
Димитриеска-Кочоска: Тоа е програма којашто ја гласало мнозинството на граѓани коишто излегле да гласаат на изборите во 2024 година. Што значи дека граѓаните поддржале таков предлог.
„360 степени“: Бидејќи ја спомнувате предизборната програма, дозволете да Ви го прочитам објаснувањето за линеарното зголемување на пензиите во програмата на ВМРО-ДПМНЕ од 2024 година: „Начинот на пресметка на зголемувањето на пензиите во последните години доведе до зголемување на финансискиот јаз помеѓу пензионерите, со што драстично се зголеми бројот на пензионери чии примања не ги задоволуваат основните животни потреби“. И сега ако ги замениме пензионери со работници, пензии со минимална плата, што е неточно за висината на минималната плата во однос на задоволувањето на основните животни потреби?
Димитриеска-Кочоска: Сега повторно се враќаме на она што значи предизборна програма каде што сме дале ветување, така? Во однос на минималната плата има закон. Тоа е ставот на Владата. Владата во моментот вели дека Законот за минимална плата е тој што е на сила. Кај пензионерите, ние не го зголемуваме купот. Сега, ние го зголемивме во програмата, нели, со ветувањето 5 000 денари за секој пензионер, па потоа се вративме на постоечкиот закон. Меѓутоа, и таму кажавме линеарно. Вкупниот износ на пензии коишто ги даваме не ги променивме. Во конкретнава ситуација, значи остануваме на постоечкото законско решение. Начинот како ги префрламе средствата.
Во однос на најавата од работодавачите дека се подготвени да се согласат со зголемување на минималната плата над законски предвиденото усогласување, ако Владата во одреден временски период ги покрива придонесите за разликата меѓу актуелното ниво на минималната плата и евентуално новото ниво, Димитиреска-Кочоска вели:
„Владата може да ги покрива платите на администрација. Ние тука зборуваме за приватен сектор. Приватен сектор којшто апсолутно не е дел од покривањето на платите од буџетот. И затоа велам, не можеме да ги мешаме сега работите. Пак повторувам, пензионерите се дел од буџетот. Платите на администрација се дел од буџетот. Треба ли да повториме за колку луѓе вработени во администрација, ајде така да ги кажам, независно дали станува збор за административни или јавни службеници, ние ги зголемивме платите? Зголемивме во здравство, зголемивме во образование, зголемивме во поголем дел од институциите, во МВР каде што се повеќе од 13 000 вработени. Ние сме се погрижиле за нашите вработени. Ова е комуникација да кажам или дијалог којшто треба да го водат работодавачите и работниците – колку работодавачите се спремни, меѓутоа не зборуваме да се спремни само на желба, туку и од аспект на економски параметри, од аспект на продуктивноста. Затоа Владата вели – ние го поставивме законот, доколку сметате дека треба да одиме надвор од законот, договорете се меѓу себе“.
На новинарско прашање што би изгубила Владата со овој пристап (работодавачите да го покријат нето-зголемувањето, а Владата да ги покрие придонесите), министерката вели дека таа, а и буџетот не би изгубиле ништо, но не упати за ова да прашаме во Владата и во надлежното Министерството за економија и труд.