Премиерот рече дека во моментов во постапка се над 50 предмети за висока корупција, за кои рече дека со години биле затскриени или игнорирани. Во оваа смисла додаде дека се очекува да бидат отворени нови случаи кои ќе бидат под темелна истрага и кои треба да ја вратат довербата на граѓаните во државата и институциите
Нема селективна правда, нема заштитени, нема недопирливи. Украденото мора да се врати кај народот – порача премиерот Христијан Мицкоски на денешната конститутивната седница на Националниот совет за финансиски истраги и кофискација на имот. Мицкоски вели дека е за засилени мерки во борбата против корупцијата, но таа, како што рече, не завршува со кривична постапка туку со одземање на незаконски стекнатиот имот.
Премиерот рече дека во постапка се над 50 предмети за висока корупција, за кои рече дека со години биле затскриени или игнорирани. Во оваа смисла додаде дека се очекува да бидат отворени нови случаи кои ќе бидат под темелна истрага и кои треба да ја вратат довербата на граѓаните во државата и институциите.
„За таа борба да биде успешна, потребно е јакнење на судството и обвинителството, институционално, кадровски и функционално. Само силно, независно и професионално судство и обвинителство можат да ја изнесат оваа борба до крај и да обезбедат правдата да не биде спора, ниту селективна, туку ефикасна и правична“,
изјави тој на конститутивната седница на Националниот совет за финансиски истраги и кофискација на имот.
Мицкоски вели дека конфискацијата на незаконски стекнатиот имот е процес кој опфаќа повеќе меѓусебно поврзани и условени фази, со вклученост на повеќе институции. Во оваа смисла, премиерот вели дека Стратегијата за периодот 2025-2028 година јасно ги дефинира трите приоритетни области на дејствување:
„Прво, пронаоѓање, идентификување и следење на незаконски стекнатиот имот и имотната корист, не само во земјата, туку и надвор од неа, преку меѓународна соработка и современи финансиски истражни механизми. Второ, привремено обезбедување и конфискација на имот и имотна корист, брзо, ефикасно и во согласност со законот, без простор за манипулации, одолговлекувања или злоупотреби. И трето, ефикасно управување со одземениот и конфискуваниот имот, вклучително и неговата повторна употреба за социјални цели, затоа што одземениот криминален имот мора да добие нова, општествено корисна вредност и да се врати во служба на граѓаните“,
вели Мицкоски.
Обраќајќи се на тимот што ќе го води Советот, а кој ќе биде под водство на вицепремиерот за добро владеење Арбен Фетаи, Мицкоски порача дека очекува професионалност, храброст и интегритет, но пред сè резултати.