И покрај позитивните поместувања во однос на поддршката за членство во Унијата, останува поделеноста помеѓу граѓаните во однос на следните чекори во евроинтеграцискиот процес. Најголемиот дел од испитаниците, односно 27 отсто, претпочитаат репреговарање на Преговарачката рамка, додека 24 проценти од граѓаните поддржуваат уставни измени – покажува анализата на Институтот за демократија
Дури 71 отсто од граѓаните во земјава лани се изјасниле дека поддржуваат членство на земјава во Европската Унија, што е зголемување од речиси 10 проценти во споредба со 2024 година. Ова го покажува Анализата на јавното мислење за пристапувањето на Северна Македонија во ЕУ изработена од Институтот за демократија „Социетас цивилис“ што денеска беше презентирана во Собранието.
Податоците покажуваат дека поддршката за членство на С Македонија во ЕУ значително се зголемила во 2025 година, а забележлив е и значителен пад на бројот на неопределени и апатични граѓани. Растечка поддршка за евроинтеграцискиот процес има кај младите, додека населението над 55 години останува најевроскептично.
Со растот на поддршката, се нотира и променета перцепција кај граѓаните за самиот процес на евроинтеграцијата.
„Во 2025 година, 51 процент од испитаниците го гледаат процесот на преговори со ЕУ првенствено како усогласување со законодавството и стандардите на Унијата, наспроти 33 проценти во 2024 година, што претставува значително зголемување и укажува на посозреано разбирање на природата на евроинтеграцијата“,
се наведува во анализата на Институтот за демократија.
Дополнително, се забележува намалување на јазот на поддршката за членство во ЕУ помеѓу етничките Македонци и етничките Албанци како две најголеми етнички заедници во државата. Дури 71 отсто од етничките Македонци минатата година се изјасниле дека го поддржуваат членството на земјава во Европската Унија, што е раст од 15 проценти во однос на 2024 година. Поддршката кај етничките Албанци и натаму останува висока.
Според анализата, членството во ЕУ останува важно за околу 70 проценти од населението, а за речиси една третина од испитаниците пристапувањето во Унијата има мало или никакво значење. Главните причини за забавениот процес на пристапувањето кон ЕУ и пречките во напредокот на евроинтеграциите граѓаните ги лоцираат во надворешните фактори и опструкциите од соседните држави.
И покрај позитивните поместувања, останува поделеноста помеѓу граѓаните во однос на следните чекори во евроинтеграцискиот процес. Најголемиот дел од испитаниците, односно 27 отсто, претпочитаат репреговарање на Преговарачката рамка, додека 24 проценти од граѓаните поддржуваат уставни измени.
„Поддршката за уставните измени останува стабилна во период од три години (20–24 проценти), што укажува на долгорочна конзистентност во ставовите Поддршката за промена на Преговарачката рамка е повеќе од двојно зголемена од 2023 година (од 13 на 27 отсто), што одразува растечка фрустрација од надворешните услови, а не од самата Европска Унија. Јавното мислење е длабоко поларизирано по етничка линија – 57 проценти од етничките Албанци ги поддржуваат уставните измени, наспроти само 11 проценти од етничките Македонци“,
се наведува во анализата на Институтот за демократија.
Граѓаните и натаму ги перципираат измените на Уставот како неопходни, но не и итни, при што 52 проценти од испитаниците ги рангираат како втор приоритет.