Адвокатката Ивана Коцевска, бранителка на сопственикот на „Пулс“ и неговиот син, побара од сите надлежни институции да реагираат поради злоупотреба на нејзиниот лик
Судијката Диана Груевска-Илиевска на почетокот на денешното рочиште се осврна на тензиите меѓу родителите и обвинетите на претходното рочиште и рече дека доколку тоа повторно се случи, ќе ја отстрани јавноста од судницата или рочиштето ќе биде прекинато
Родителите на загинатите во пожарот на т.н. кабаре „Пулс“ ги отфрлија како неосновани тврдењата на адвокатката Ивана Коцевска дека го злоупотребиле нејзиниот лик на „Маршот на ангелите“ во саботата.
„Кога јавно зборувате за сочувство и емпатија кои сте ги имале кон нас, родителите, мораме да ве потсетиме на вашите сопствени зборови изговорени пред луѓе кои ги изгубија своите деца. На судењето рековте дека обвинетиот требало да одговара за небрежност, а не за тешки дела против општата сигурност, дека немал свест за обврските и најтешката реченица што ни ја упативте дека за нас тој е монструм, а за вас тој е обичен човек. Тоа не е емпатија, тоа е суровост”,
изјави Александар Наунов, татко на починатата Надица Наунова.
Тој рече оти тврдењата на адвокатката Коцевска дека нејзиниот лик бил злоупотребен во небулозна форма не се точни.
Според него, и други лица се препознавале во ликот на постерот, но не реагирале.
„Тоа тврдење не само што е неточно, тоа е потценување на нашата интелигенција. На постерот не се препознавате само вие, се препознаваат и други лица кои имаат физичка сличност со ликот, но никој од нив не реагираше ниту ја толкуваше пораката како напад. Единствено, вие, адвокатке Коцевска, излеговте со тврдења дека сте биле лично засегнати. А зошто? Ние семејствата не ве ни споменавме, ниту ве нападнавме. Ние семејствата се бориме за вистината за изгубените животи на нашите најмили”,
кажа Наунов.
Тој рече дека родителите организирале марш, а не штрајк против адвокатите.
Кажа оти се свесни дека секој има право на бранители, дека на угледот на правната заедница не ѝ штетат родителите, туку им пречи обидот на адвокатката да прикаже дека нејзиниот клиент не бил свесен за обврските што ги имал за безбедноста на објектот.
Имено, родители и блиски на загинатите во пожарот на протестот во саботата носеа транспаренти на кои беше прикажана таа како со куфери со пари е во светот на покојните, а до неа стои митска персонификација на ѓавол или ангел на смртта, кој, според написот на транспарентот, ѝ вели:
„Пари овде не ти се потребни“.
Со искази на сведоци на Обвинителството треба да продолжи судењето за „Пулс“
Адвокатката Ивана Коцевска, бранителка на сопственикот на „Пулс“ и неговиот син, побара од сите надлежни институции да реагираат поради злоупотреба на нејзиниот лик.
Судијката Диана Груевска-Илиевска на почетокот на денешното рочиште се осврна на тензиите меѓу родителите и обвинетите на претходното рочиште. Рече дека доколку тоа повторно се случи, ќе ја отстрани јавноста од судницата или рочиштето ќе биде прекинато.
Предупредувањата беа упатени кон родителите.
„Тие (адвокатите) си ја вршат својата работа. Мора да бидат тука. Ако некогаш ви биде потребен адвокат, нив ќе ги барате”,
рече судијката.
Таа нагласи дека редот во судницата мора да се почитува и дека тоа е од клучно значење за текот на постапката.
Адвокатката Ивана Коцевска исто така се обрати и побара доколку има дофрлања и вербални напади кон адвокатите и обвинетите, јавноста да биде исклучена.
Дел од другите бранители и обвинети тврдеа дека по рочиштето на 29 декември лани забележале оштетувања на нивните автомобили.