„Гаранцијата е определена на износ од 4 937 317 евра, што значи дека е речиси трипати повисока од евентуалната имотна корист“, наведуваат од Основниот суд Битола
Кривичниот совет при Основниот суд Битола му ја укина мерката притвор на Борче Марковски, сопственик на „Марковски компани“, кој е еден од осумте обвинети за злоупотреба на тендерот за дислокација на погонските станици од рудникот „Осломеј” во рудниците на РЕК „Битола“ вреден 1,7 милиони евра.
Во соопштението за случајот кое денеска го објави Основниот суд Битола се наведува дека во октомври минатата година, бранителот на Марковски поднел предлог за укинување на притворот и определување гаранција во износ од 4,9 милиони евра во движен и недвижен имот. Еден месец подоцна, битолското обвинителство доставило мислење до Судот со предлог да не се прифаќа барањето на бранителот на Марковски.
„Судија на претходна постапка донесе решение со кое предлогот на осомничениот поднесено преку неговиот бранител за укинување на мерката притвор и определување на гаранција, како и мерка за обезбедување на присуство на осомничениот го одби како неосновано“,
се наведува во соопштението на Судот.
Бранителот на Марковски ја обжалил ваквата одлука на Судот.
На 16 јануари годинава, Кривичниот совет при Основниот суд Битола одржал седница на која ја прифатил жалбата на обвинетиот – прифатил да се определи гаранција од 4,9 милиони евра во движен и недвижен имот, да се укине мерката притвор и да се определат мерки на претпазливост – привремено одземање на пасошот и забрана за издавање нов, како и обврска обвинетиот еднаш неделно да се јавува во Основниот суд Битола.
„После впишувањето на заложните права – хипотеката на недвижните имоти во Агенцијата за катастар на недвижност, како и заложниот регистар и воспоставување на залог над подвижните имоти во Централниот регистар, осомничениот беше пуштен од притвор. Гаранцијата е определена на износ од 4 937 317 евра, што значи дека е речиси трипати повисока од евентуалната имотна корист, а и му се замрзнати финасиски средства“,
информираат од Судот.
На 2 јануари годинава ОЈО Битола поднесе обвинение против осум физички и едно правно лице, меѓу кои и бизнисменот Борче Марковски, поради злоупотреби на јавни набавки во РЕК „Битола“.