Министерот за здравство вели дека лицата кои не пушат, стануваат пасивни пушачи кога активните пушачи пушат во затворени простории, а со тоа влегуваат во ризик-фактор на население и може да се соочат со здравствени проблеми
Околу 50 отсто од популацијата е зависна од цигари и пуши околу 18-22 цигари дневно што е двојно повеќе во споредба со европските стандарди, вели министерот за здравство Азир Алиу во интервју за Телевизија 24. Oсобено алармантно, како што вели, е тоа што има пушачи и од најрана возраст, од 13-14 години има 7,7 отсто активни пушачи, од 15-16 години се некаде 37 процени, а на електронски цигари има 40 проценти активни пушачи.
Министерот вели дека законот за заштита од пушење, кој сè уште не е донесен, не е против пушачите, туку дека целта со него пред сè е да се заштитат непушачите кои се околу 50 отсто од населението, а истовремено на пушачите да им помогне да се откажат од консумирањето цигари.
„Замислете наш граѓанин кој работи во угостителски објект каде што се пуши внатре. Тој без оглед дали сака или не, пасивно е изложен на чад од цигари осум часа на ден и на крајот од денот е пасивен пушач. Замислете колку е државата виновна кон тој граѓанин макар и еден да е, тој ќе седи во затворена просторија во која се пуши“,
изјави министерот за здравство.
Вели дека и пасивните пушачи се во ризик-фактор на население и може да се соочат со здравствени проблеми.
„Разговарав со колеги од разни институции и со доктори кои велат дека многу често има случаи на кардиоваскуларни заболувања кога пациентите велат дека самите не се пушачи, но дома имаат членови на семејството кои пушат во затворени простории. Тоа значи дека и пасивните пушачи се во ризик, кога активните пушачи пушат во затворени простории. Нас како држава целта ни е да ги заштитиме граѓаните кои не се пушачи“,
додаде министерот.
Освен целосна забрана за пушење во јавни и работни простории, предлог-законот за заштита од пушење изработен од Министерството за здравство предвидува и забрана за рекламирање, промоција и спонзорирање од страна на тутунската индустрија, регулирање на продажбата, прикажувањето и изложувањето на тутунски и никотински производи.