Како што објави Министерството за внатрешни работи, се работи за 18-годишниот Саит Саитов од Скопје, од татко Берти и мајка Ганимете
Министерството за внатрешни работи распиша меѓународна потерница по 18-годишниот возач што минатата недела со „фолскваген пасат“ усмрти 79-годишна жена во скопски Капиштец, па побегна од државата.
Како што објави МВР, се работи за Саит Саитов од Скопје, од татко Берти и мајка Ганимете од Скопје.
„Лицето е барано по централна и меѓународна потерница по барање на Основното јавно обвинителство Скопје за кривично дело по член 300 од Кривичниот законик“,
се наведува во потерницата распишана од МВР.
Сообраќајката во која учествуваше 18-годишниот Саитов се случи на 9 јануари во скопската населба Капиштец, кога со автомобил „фолскваген пасат“ во сопственост на својот татко, тој удри во 79-годишна жена и побегна од местото на несреќата. Уште истиот ден Саитов и неговиот татко со помош на уште две лица ја напуштиле државата.
Изнесувајќи детали за сообраќајката, од Основното јавно обвинителство Скопје викендов информираа дека 18-годишникот возел непрописно и без важечка возачка дозвола. Додека го возел „пасатот“ на татка си по улицата „Народен фронт“ во Скопје, непрописно се поместил во лево, на коловозната лента наменета за сообраќај од спротивната лента и се движел со неприспособена брзина по што удрил во пешакот Љуба Јаковлеска.
Обвинителството побара притвор за 18-годишникот кој ќе почне да се спроведува по неговото приведување.