Во обвинението поднесено во федералниот суд во Њујорк, се вели дека повеќе од 25 години, лидерите на Венецуела „ги злоупотребуваа своите позиции на јавна доверба и ги корумпираа некогаш легитимните институции за да увезат тони кокаин во САД“
САД поднесоа ново обвинение против заробениот венецуелски претседател Николас Мадуро, во кое сега е вклучена и неговата сопруга Силија Флорес и синот, пишува „Гардијан“.
Во обвинението поднесено во федералниот суд во Њујорк, се вели дека повеќе од 25 години, лидерите на Венецуела „ги злоупотребуваа своите позиции на јавна доверба и ги корумпираа некогаш легитимните институции за да увезат тони кокаин во САД“.
„Николас Мадуро, обвинетиот, е на чело на таа корупција и соработувал со своите соучесници за да го искористи својот нелегално стекнат авторитет и институциите што ги кородираше за да транспортира илјадници тони кокаин во САД“,
се додава во обвинението.
Во обвинението се додава дека обвинетиот сега седи на врвот на корумпирана, нелегитимна влада која со децении ја користела владината моќ за заштита и промовирање на нелегални активности, вклучително и трговија со дрога.
Според американските обвинители, Мадуро е вклучен во шверц со кокаин уште од раните денови на неговата политичка кариера, прво како пратеник, потоа како министер за надворешни работи, а потоа и како претседател на Венецуела. Во обвинението се тврди дека тој го олеснувал транспортот на дрога под заштита на државата, им издавал дипломатски пасоши на дилери на дрога и обезбедувал непречен премин на авиони и бродови со дрога.
Според обвинението, Венецуела со години служела како клучен центар за трговијата со кокаин, а американските власти проценуваат дека помеѓу 200 и 250 тони дрога годишно минувале низ таа земја. Кокаинот се испорачувал од Венецуела до САД преку поморски патишта низ Карибите и по воздушен пат од тајни и официјални аеродроми контролирани од корумпирани воени и владини службеници.
Во документот се наведува дека владата на Мадуро соработувала со голем број наркотерористички организации, вклучувајќи ги колумбиските герилски групи ФАРК и ЕЛН и мексиканските картели како што се Синалоа и Зетас, како и озлогласената венецуелска криминална мрежа Трен де Арагуа. На овие групи, според обвинението, им било дозволено слободно да дејствуваат на венецуелска територија во замена за пари, оружје и политичка заштита.
Неговата сопруга Силија Флорес е обвинета за примање мито и учество во организирање шверц, додека нивниот син Николас Мадуро Гера наводно е директно вклучен во испраќање пратки со кокаин, вклучително и планови за шверц на дрога во Њујорк и Мајами.
Американскиот претседател Доналд Трамп претходно изјави дека Мадуро е на пат кон Њујорк, каде што ќе се соочи со сериозни обвиненија за „наркотероризам“.
Главната обвинителка на Соединетите Американски Држави (САД), Пам Бонди денеска соопшти дека Мадуро и неговата сопруга Силија Флорес се обвинети за повеќе кривични дела поврзани со дрога и оружје.
Мадуро, како наведе, е обвинет за заговор во рамките на наркотероризам, заговор за увоз на кокаин, поседување оружје и деструктивни направи, како и заговор за поседување оружје и деструктивни направи против Соединетите Американски Држави.
Претходно американскиот претседател Доналд Трамп на социјалната мрежа Трут Соушл соопшти дека Соединетите Американски Држави (САД) извршиле голем воздушен напад врз Венецуела, како и дека го заробиле нејзиниот лидер, претседателот Николас Мадуро и неговата сопруга во операција спроведена со учество на американските агенции за спроведување на законот.