Напаѓачите, исто така, снимале и видеа пред знамето на „Исламската држава“, изнесувајќи ги своите ставови што сугерираат дека се придржуваат до „религиозно мотивирана насилна екстремистичка идеологија“
Таткото и синот Саџид и Навид Акрам, кои минатата недела го извршија најсмртоносниот терористички напад на плажата Бонди во Сиднеј, непосредно пред да почнат да пукаат, фрлиле и четири бомби што не експлодирале, пренесува Си-ен-ен повикувајќи се на судски документи.
Една од бомбите била со големина на тениско топче, а петтата бомба била пронајдена во багажникот на нивниот автомобил.
Судскиот документ вклучува и видеоснимки на кои се гледаат 50-годишниот Саџид Акрам и неговиот син Навид Акрам (24) како држат пушки и се движат на начин што сугерира на елементи од тактичка обука.
Претходно, напаѓачите, исто така, снимале и видеа пред знамето на „Исламската држава“, изнесувајќи ги своите ставови што сугерираат дека се придржуваат до „религиозно мотивирана насилна екстремистичка идеологија“.
Во едно видео двајцата даваат изјави со кои ги „осудуваат дејствијата на ционистите“ и, како што се вели, „го сумира нивното оправдување за терористичкиот напад во Бонди“.
„Постојат докази дека обвинетиот и неговиот татко детално го планирале овој терористички напад со месеци“,
се наведува во документот.
Таткото и синот ја посетиле плажата Бонди на 12 декември, само два дена пред нападот. Снимките од безбедносните камери ги покажуваат како одат по пешачкиот мост од каде потоа ги застрелаа и првите жртви.
„Полицијата вели дека ова е доказ за извидување и планирање терористички чин“,
се вели во судскиот поднесок.
По нападот, полицијата извршила претрес на адреса на нивното престојувалиште, каде се пронајдени два телефони, рачно изработено огнено оружје, лак со 12 стрели и Куран со обележани пасуси.
Навид Акрам, кој беше застрелан во стомакот за време на нападот, одбил да даде формална изјава на полицијата од болничкиот кревет, по совет на неговиот адвокат.
Неговото појавување пред суд е закажано за април.
Во терористичкиот напад на плажата Бонди во Сиднеј загинаа 16 лица, вклучувајќи го и еден од напаѓачите, а околу 40 се повредени.
Австралиската Еј-би-си објави дека синот Навид Акрам е роден во Австралија, а пред повеќе од пет години бил испрашуван од полицијата за неговите блиски врски со терористичката ќелија на „Исламска држава“ со седиште во Сиднеј. Тогаш била направена проценка дека нема индикации за каква било закана или можност да биде вклучен во некаков вид насилство.
Таткото Саџид, пак, пристигнал во Австралија во 1998 година. Тој имал дозвола за огнено оружје за рекреативен лов и бил член на стрелачки клуб.