Тие денеска информираа дека поднеле и иницијатива за свикување итна седница на Советот на Град Скопје, на која би биле утврдени заклучоци и донесени итни мерки за намалување на загадувањето во главниот град
Опозицискиот Социјалдемократски сојуз на Македонија (СДСМ) бара во Скопје да биде прогласена еколошка и здравствена кризна состојба поради виското ниво на аерозагадување во главниот град што се бележи изминатите неколку дена.
Барањето денеска го изнесоа советниците на СДСМ во Советот на Град Скопје, кои информираа дека поднеле и иницијатива за свикување итна седница на Советот, на која ќе бидат утврдени заклучоци и донесени итни мерки.
Според советничката Катарина Цаневска-Арсовска, која говореше на прес-конференцијата, коалицијата во Советот предводена од СДСМ бара да се донесе одлука со која намалувањето на загадувањето ќе биде утврдено како приоритет на градските власти. Ова како, што кажа таа, значи Градот Скопје да финансира мерки во насока на намалување на аерозагадувањето, бидејќи досега воопшто не се инвестирало во проекти за почист воздух, поради што граѓаните се оставени сами на себе.
Недостигот на еколошки проекти, рече Цаневска-Арсовска, веројатно се должи на изјавите на премиерот Христијан Мицкоски дека воздухот во Скопје е почист од воздухот во Виена.
„Тоа мора да се промени веднаш, за здравјето на скопјани се работи, за половина милион жители, деца, возрасни, млади, сите се засегнати. Затоа советничката група на СДСМ и коалицијата во Град Скопје поднесе иницијатива за свикување вонредна седница на Советот на Град Скопје.
Бараме поддршка од сите советнички групи во Советот да ја оджиме оваа седница и да утврдиме заклучоци и итни мерки. Здравјето на скопјани е во прашање и затоа заедно да донесеме мерки за решавање на проблемот“,
рече таа.
Дополнително, таа ги наведе мерките што нивната советничка група има намера да ги поднесе на седницата, доколку биде закажана, а кои опфаќаат од бесплатен јавен превоз до забрана за греење со дрва и јаглен и понатамошно расчистување на дивите депонии во главниот град.
„На самата седница ние ќе предложиме мерки: Бесплатен јавен превоз во деновите кога воздухот е загаден, да се побараат пари од владата за бесплатни филтри на оџаците на големите загадувачи, пренамена на пари за прочистувачи, да се донесе забрана за греење со дрва и јаглен во подрачја со достапно централно греење. Понатаму, расчистување на дивите депонии на територија на Град Скопје, миење на улиците и пари за еколошки проекти“,
рече Цаневска-Арсовска.
Таа на крајот наведе дека не може да има пари за милионски тендери, а да нема пари за здравјето на Скопјани.
„Не може богатењето на поединци во власта да биде поважно од здравјето на скопјани. Да застанеме сите заедно на страната на Скопјани, да делуваме веднаш“,
порача таа.
Главниот град на државата, утрово се најде на 21. место на најзагадени градови светот и прв во Европа, според податоците на светскиот сервис на мерење на квалитетот на амбиенталниот воздух „Ај-кју ер“ (IQAir).
Министерството за животна средина и просторно планирање завчера издаде препораки до граѓаните за заштита од загадувањето. На сите работодавци и им се препорачува да ги ослободат од работни обврски бремените жени, лицата постари од 60 години, како и граѓаните со хронична астма, прележан срцев удар или мозочен удар, без оглед на возраста. На оние кои мора да работат на отворено им се препорачува смените да им бидат поместени во интервалот од 11 до 17 часот.
Од Министерството препорачаа интензивирање на вонредните инспекциски надзори на инсталациите со А-интегрирана еколошка дозвола, како и на инсталациите со Б-интегрирана еколошка дозвола и елаборати.