Сепак, претседателката на српскиот парламент рече дека нема да поддржи национализација на НИС бидејќи, според неа, тоа би ја отворило Пандорината кутија
Претседателката на српскиот парламент Ана Брнабиќ најави дека денеска ќе биде предложен амандман на Предлог-буџетот за 2026 година, со кој ќе се предвидат околностите во кои Србија би морала да ја преземе Нафтената индустрија на Србија (НИС).
„Еден од амандманите што ќе бидат предложени ќе биде оној што ќе ја предвиди околноста дека во одреден момент ќе мора да го преземеме НИС“,
изјави Брнабиќ за „Еуроњуз“.
НИС е под санкции на Соединетите Американски Држави од 9 октомври поради нејзиното мнозинско руско сопствеништво, што ја остави рафинеријата за нафта во близина на Белград без сурова нафта за преработка.
Брнабиќ, сепак, додаде дека нема да поддржи национализација на НИС.
„Не би поддржала национализација затоа што сум економски либерал. Мислам дека национализацијата не е правилниот пат бидејќи ја отвора Пандорината кутија…Се надевам дека руските партнери ќе го земат тоа предвид“,
рече Брнабиќ.
Таа додаде дека Србија како малцински сопственик на НИС ѝ понудила на Русија да учествува во разговорите за можни промени во сопственичката структура и изрази очекување дека руските партнери ќе имаат предвид дека ништо не смее да го загрози животниот стандард на граѓаните и економијата.
Претходно, српскиот претседател Александар Вучиќ изјави дека српската влада ѝ дала на Русија рок од 50 дена да најде нов сопственик на Нафтената индустрија на Србија.
„Но, ако нема продажба на НИС ниту по 50 дена, немаме избор и ќе мора да ја воведеме нашата администрација и да им ја понудиме највисоката можна цена на нашите руски пријатели“,
рече Вучиќ.
Сопственичката структура на НИС е променета неколку пати, но компанијата сè уште е во мнозинска сопственост на Русија. Во 2008 година Србија продаде 51 процент од акциите во НИС на руската државна компанија „Гаспром Нефт“ за 400 милиони евра.