Според спикерот, иницијативата на опозициските партии е неуредна затоа што излегува од рамките на членот 124 од Деловникот, односно во неа се бара анкетната комисија да биде составена од 15 члена и мнозинството во неа да го имаат опозициските партии
Пратеничките групи на ВМРО-ДПМНЕ, ВЛЕН и ЗНАМ исто така предлагаат да се формира анкетна комисија, но, освен за трагедијата во Кочани, тие бараат на неа да бидат разгледани и претходните случаи, за кои од владејачкото мнозинство сметаат дека не добиле соодветна правна разрешница
Иницијативата за формирање анкетна комисија во парламентот за трагедијата во т.н. кабаре „Пулс“ во Кочани што минатата недела ја поднесе СДСМ, а на која се придружи и Левица, ќе биде вратена на доработка затоа што има недостатоци. Ова денеска на брифинг со новинарите го соопшти претседателот на Собранието, Африм Гаши, кој додаде дека штом недостатоците бидат коригирани, иницијативата ќе биде веднаш ставена во процедура.
Како што соопшти Гаши, иницијативата е неуредна затоа што се коси со Деловникот за работа на законодавниот дом.
Според спикерот, излегува од рамките на членот 124 од Деловникот бидејќи двете опозициски партии бараат анкетната комисија за трагедијата во Кочани да биде составена од 15 члена и мнозинството во неа да го имаат опозициските партии.
Вообичаено според Деловникот, мнозинството во комисиите од ваков обем, како што кажа Гаши, треба да го имаат владејачките партии. Конкретно, наведе тој, составот на овие комисии се одредува согласно бројот на пратеници што секоја од пратеничките групи го има, додека претседателското место е резервирано за опозицијата.
Членот 124, на кој се повикува Гаши, во ставот 5 вели дека:
„Составот на работните тела и на анкетните комисии се утврдува со одлука на Собранието, во зависност од бројот на пратениците во пратеничките групи, пратениците кои не се организирани во пратеничка група и во согласност со закон“
„Претседателите на анкетните комисии по правило се од редот на пратениците на пратеничките групи во опозиција“,
се вели во ставот 6 од истиот член.
Гаши рече дека штом подносителите на иницијативата ќе ги отстранат овие недостатоци и ќе го доуредат документот, тој веднаш ќе биде ставен во процедура.
Од друга страна, партиите од владејачкото мнозинство не чекаа нивните колеги од опозицијата да се изјаснат околу иницијативата, па поднесоа своја.
Пратеничките групи на ВМРО-ДППМНЕ, ВЛЕН и ЗНАМ, кои стојат зад иницијативата, исто така предлагаат формирање анкетна комисија. Но, освен за трагедијата во Кочани, тие бараат на неа да бидат разгледани и претходните случаи, за кои од владејачкото мнозинство сметаат дека не добиле соодветна правна разрешница.
Освен пожарот во „Пулс“, владејачкото мнозинство бара на анкетната комисија да бидат разгледани и случаите со автобуските несреќи на „Дурмо турс“ и „Беса транс“ и пожарот во модуларната болница во Тетово.
Ставот на пратениците од мнозинството на прес-конференција го пренесе пратеникот од редовите на ВМРО-ДПМНЕ, Бојан Стојаноски, кој кажа дека тоа што тие го бараат треба да помогне да се создаде систем кој веќе нема да дозволи да се случуваат вакви трагедии.
„Очекуваме вистинските виновници да излезат на површина и тоа да помогне системот да се реконфигурира за вакво нешто никогаш повеќе да не се случува, бидејќи како што кажав според мислењето на многумина кои се оштетени или кај граѓаните постои заклучок дека вистинските виновници се неказнети и затоа ваквите трагедии се повторуваат. Со оваа анкетна комисија единственото нешто што треба да го направиме како политичари и како државата е да формираме систем што нема да дозволи вакво нешто да се случува“,
рече Стојаноски.
Пратениците на СДСМ и коалицијата во вторникот (18 ноември) поднесоа иницијатива за основање анкетна комисија за трагедијата во Кочани. Кон иницијативата, што беше дел и од барањата на семејствата на загинатите и повредените во пожарот, се придружија и пратениците од Левица.
„Анкетната комисија треба да ја утврди целата вистина, како и на кој начин била загрозена безбедноста на присутните во објектот во Кочани, да ги утврди институционалните пропусти, прекршувањата на законските одредби, како и да лоцира политичка одговорност. Врз основа на наодите, пратениците предлагаат анкетната комисија да изготви и на Собранието да му поднесе Извештај најдоцна еден месец по завршување со работа“,
соопштија тогаш од СДСМ и го повикаа Собранието што поскоро да ја формира анкетната комисија за да може да започне со работа.
Од ВМРО-ДПМНЕ, претходно истиот ден, рекоа дека ќе поддржат формирање анкетна комисија, но со барање таа да биде проширена и на неа да се расправа и за другите трагедии што изминатите неколку се случија во државата и однесоа голем број човечки животи.
Инаку, пратеникот од Левица, Димитар Апасиев, најави дека како претседател на Постојаната анкетна комисија за заштита на слободите и правата на граѓанинот во Собранието, следната недела ќе закаже посебна комисиска седница на која ќе се разгледува претставката од семејствата на загинатите во Кочани испратена преку „Здружението 16 март“.
Засега нема известување на веб-страницата на Собранието дека е закажана седница на ова работно тело на Собранието.