Министерот за труд и социјална политика Бесар Дурмиши посочи дека несреќите се сериозен проблем особено во градежништвото, земјоделството, транспортот и преработувачката индустрија
Од Советот за безбедност и здравје при работа сметаат дека новата стратегија за безбедност и здравје при работа мора да се донесе час поскоро
Од почетокот на годинава до септември во земјава шест лица го загубиле животот на работното место. Годишно, на глобално ниво, се регистрираат над 2,9 милиони смртни случаи и 400 милиони повреди на работни места. Економската загуба од овие несреќи на светско ниво изнесува 4 отсто од глобалниот БДП. Ако овие проценти се применат во Македонија, економските загуби од несреќи при работа би изнесувале 500 до 600 милиони евра годишно.
Ова се податоци што беа презентирани на почетокот на тригодишниот проект „Кон безбедна и здрава работна средина во Северна Македонија“, поддржан од Европската Унија и Меѓународната организација на трудот (МОТ).
Директорот на Државниот инспекторат за труд, Гани Маскути, информира дека шест работници го загубиле животот на работното место до септември оваа година, што е намалување во однос на 13 жртви лани.
Вицепремиерот Љупчо Димовски нагласи дека безбедноста и здравјето се основни човекови права и показател за зрелоста на државата.
„Состојбата кај нас не е на ниво кое тежнееме, податоците покажуваат дека бројот на повреди на работа и натаму е висок. Затоа мораме да работиме на системска надградба“,
рече Димовски.
Министерот за труд и социјална политика Бесар Дурмиши посочи дека несреќите се сериозен проблем особено во градежништвото, земјоделството, транспортот и преработувачката индустрија.
„Нашата цел е јасна, да изградиме систем кој не реагира само по настанот, туку предвидува, спречува и штити“,
рече Дурмиши додавајќи дека законите сами по себе не се доволни, туку е потребна институционална инфраструктура, инспекциски служби и систем за обука.
Претседателот на Сојузот на синдикати на Македонија (ССМ), Слободан Трендафилов, рече дека овој проект треба да ги поттикне сите институции да започнат од себе за ревидирање на процедурите за процена на ризици и смета дека проектот да создаде одржлив систем, а не само да биде „спроведен проект и потрошени средства“.
Претседателката на Советот за безбедност и здравје при работа, Јасмина Чалоска, предупреди на стагнација на многу процеси – законот за кој се работи повеќе од пет години сè уште не е донесен, стручен испит за кадри за безбедност при работа не е организиран четири до пет години, што создава дефицит на пазарот на труд.
Таа порача дека новата стратегија за безбедност и здравје при работа мора да се донесе час поскоро.
Советникот во Делегацијата на ЕУ, Александру Албу, нагласи дека проектот е чекор кон усогласување со европските стандарди, бидејќи инвестициите во здравјето на работниците водат кон продуктивност и конкурентност.
Проектот на МОТ и ЕУ предвидува изработка на Национална стратегија за БЗР 2026-2030, модернизација и дигитализација на инспекцискиот систем, креирање Национален ИТ-систем за повреди и заболувања и интеграција на безбедноста и здравјето при работа во образованието.