Седум туристи од кои две деца загинаа, а над 120 се повредени по вчерашното големо невреме кое го „удри“ грчкиот полуостров Халкидики, познато и доста посетено летувалиште.
Големото невреме, според очевидците, траело само дваесетина минути, но било доволно да ги однесе шестте животи и да нанесе огромна материјална штета, засега непроценлива.
Атанасиос Калцас, директор на медицинскиот центар во Неа Мудања, каде биле примени поголемиот број од повредените, изјавил дека за 25 години кариера првпат видел толку ненадејно невреме со толку големи последици.
Според сегашните информации, помеѓу повредените нема македонски туристи.
Помеѓу погодените летувалишта се Пефкохори, Ханиоти, Неос Мармарас, Калитеа и Никити, а Грција по ураганот прогласи вонредна состојба.
Неколку места се целосно останати без струја, а поради нередот кој го остави невремето, и сообраќајот едвај се одвива.
Грчките метеоролози за денеска најавија нови врнежи.