Вкупниот број на заразени со коронавирус во САД надмина два милиони, а 14 држави и Порторико се соочуваат со рекордно зголемување на случаите во последните седум дена.
Иако некои држави велат дека тоа е поврзано со зголемувањето на бројот на тестирани, многу од нив, како Алјаска, Аризона, Тексас, Калифорнија, Флорида, Кентаки, Ново Мексико, Северна Каролина, Тексас, беа меѓу првите што ги ублажија мерките за физичко дистанцирање.
Во Јужна Каролина, која забележа рекорден број нови случаи во текот на вчерашниот ден, отворени се спортски сали, ресторани и салони, пренесува Би-би -си.
Во неделата, во Флорида, повеќе од 1 000 нови случаи на ковид-19 беа регистрирани петти ден по ред, додека Аризона се соочува со огромно зголемување на новозаразените.
Меѓу новите случаи се и припадници на Националната гарда на округот Колумбија, кои беа ангажирани за протестите по повод смртта на Џорџ Флојд, потврди портпаролот на Гардата.
Засега не се знае точниот број на заразените кои се дел од околу 1 300 припадници на Националната гарда кои беа распоредени во округот.