Во атарот на скопското село Јурумлери, во близина на течението на реката Вардар, има депонија распослана на поголема површина. Жител на Јурумлери сведочи дека на тоа место ѓубре се истовара со камиони, како што вели, и дење и ноќе. Веднаш до депонијата има и земјоделските посеви
Додека снимавме на терен, затекнавме возило на ЈКП „Гази Баба 2007“ како заминува од правец на депонијата. Од општината, на чија територија е депонијата, велат дека возилото претоварало отпад од помали во поголеми камиони што потоа е транспортиран во депонијата „Дрисла“
Земјен пат. Од едната страна ниви со градинарски производи и пченка. Од другата страна дива депонија распослана на неколку стотини метри со купишта мешан отпад. Ваква е сликата во атарот на скопското село Јурумлери на територија на Општина Гази Баба.
Местото е во близина на течението на реката Вардар. На купиштата смет забележлив е отпад од домаќинства, градежен шут, дотраена покуќнина, остатоци од асфалт. По некое бездомно куче се шета наоколу. Ветрот на бранови носи ужасна смрдеа и облаци прашина.
Претоварна станица
Додека се приближувавме до местото, нашата камера регистрира камион што се движеше во спротивна насока. На камионот пишуваше „ЈКП Гази Баба 2007“ и имаше нови црвени службени таблички.
Што правеше таму овој камион ги прашавме во Општина Гази Баба, од каде ни одговорија дека локацијата ја користеле како претоварна станица за отпад.
„Денес ЈКП ‘Гази Баба’ реализираше активност за подигање на комуналниот смет од улиците што не го подига ЈП ‘Комунална хигиена’. На таа локација се вршеше претовар на комуналниот смет од двете помали товарни возила во едно големо возило и сметот се транспортираше во ЈП ‘Дрисла’ за што Ви доставувам и кантарна белешка со датум и час“,
велат од Општина Гази Баба.
Од Општината додаваат дека депонијата постои години наназад и дека досега неколкупати ја чистеле и вршеле надзор.
„Општина Гази Баба во изминатиот период во неколку наврати има извршено чистење на депонијата, а инспекциските служби се во постојан надзор над локацијата и за жал секојдневно се констатираат прекршоци од несовесни граѓани кои на таа локација одлагаат отпад“,
велат од Општината.
На нашето дополнително прашање – дали оваа локација ги исполнува условите за да биде користена како претоварна станица, од Општината ни рекоа дека не можат да дадат одговор без да се консултираат со секторите од администрацијата што се занимаваат со оваа област.
Сомнежи
За депонијата до редакцијата на „360 степени“ реагираше еко-активистот од неформалната група „Зелените од Гази Баба“, Дејан Димитровски. Тој е и носител на независна листа за советници на претстојните локални избори. Вели дека добиле дојава од повеќе жители на Јурумлери дека на тоа место подолго време се создава дива депонија.
„Се фрапирав од глетката. Ова, според мене, е уште еден екоцид во нашата општина. Можете и самите да видите. Се работи за десетици, можеби и стотици тони отпад. Во разговор со граѓаните дознавме дека подолго време се користи ова место за исфрлање отпад. Доаѓаат претежно во ноќните часови, а некогаш и преку ден. Камиони исфрлаат отпад, секаков вид отпад, кабаст отпад, комунален отпад. Најтрагично е што приметивме дека тука, веднаш до отпадот, има ниви каде граѓаните садат различни култури. Се прашувам каде завршуваат тие култури, каде завршува таа храна“,
изјави Димитровски за „360 степени“, а целиот разговор со него може да го погледнете во видеото.
Димитровски вели оти знае дека отпад се истура со камиони, но нема информација чии се тие. Ги повика надлежните да го истражат случајот и да постапат.
„Моја претпоставка е дека неколку општини тука исфрлаат отпад. Претпоставувам дека тоа е поради заштеда за да не се фрла во ‘Дрисла’ бидејќи секој килограм исфрлен отпад од општините треба да завршува во ‘Дрисла’ и треба да се плати од страна на општината. Апелирам општините да не трошат толку пари на забавни програми и на други работи, туку да дојдат и да си го соберат овој отпад и никогаш повеќе да не депонираат, доколку тие го прават тоа, а тоа би требало институциите да докажат, во иднина да не видиме ниту едно хартивче фрлено во делот на нашата општина“,
вели тој.
Димитровски вели дека снимил и видео на кое разговара со жител на Јурумлери. Човекот, чиј глас се слуша на видеото, но е заштитен неговиот идентитет, вели дека пред неколку дена имало толку ѓубре што по земјениот пат не можело да се помине.
„Кој фрла? Кој? Камиони, кој фрла? Што да правиме? Сега петиција сакаме. На кого да се жалиме. Сето ова е болест. Ноќе носат, во секое време носат, по ручек, навечер, шут, сè што има од град“,
вели жителот на Јурумлери со кој Димитровски разговарал.
Ова не е единствен поголем еколошки проблем со кој се соочува Општина Гази Баба. Веднаш до Јурумлери е селото Трубарево каде неодамна имаше пожар во складиште за електронски отпад. Пожарот произведе облак од густ и црн чад видлив од цело Скопје и околината. Тоа предизвика загадување на воздхуот, а надлежните и натаму ги истражуваат последиците по почвата и водата, како и по човековото здравје.
На територија на Општина Гази Баба е и депонијата „Вардариште“ на која исто така неодамна имаше голем пожар што ги вознемири жителите на цело Скопје и околината. Пожарот предизвика силна смрдеа и загадување на воздухот на што сè уште се жалат граѓаните од скопските населби во источниот дел од градот. Поради овој проблем, тие одржуваат протести блокирајќи го мостот „Близнаци“ што ги поврзува општините Аеродром и Гази Баба барајќи решение за проблемот.