Реакцијата на владејачката партија се однесува на делот од говорот на лидерот на ДУИ, Али Ахмети, во кој рече дека ако Албанците сакале да ја поделат Македонија, тогаш тоа ќе го стореле во 2001 година со 15 илјади вооружени војници
Не само што не може да ја делат Македонија, туку може и да завршат во затвор за криминал и затоа што ја разјадуваат Македонија – порачаа од ВМРО-ДПМНЕ во реакција на изјавата што вчеравечер од партиски собир во Чаир ја даде лидерот на ДУИ, Али Ахмети. Реакцијата на владејачката партија се однесува на делот од говорот на Ахмети во кој рече дека ако Албанците сакале да ја поделат Македонија, како што наводно обвинуваат дел од политичарите, тогаш тоа ќе го стореле во 2001 година со 15 илјади вооружени војници.
Од ВМРО-ДПМНЕ оценија дека ДУИ е во очај штом првиот интегративец ја споменува војната во 2001 година и се враќа наназад 24 години од кои, како што велат, 23 години беше на власт и учествуваше во газењето, компромитирањето и корумпирањето на институциите.
„Сега после 23 години власт му текна да зборува за 2001 година, конфликт чии бенефити и материјализирање најдобро го почувствуваа 50-ина луѓе од врвот на ДУИ, кои од овчари, земјоделци, механичари и слаткари (со сета почит кон чесните носители на овие професии), станаа шеици и тајкуни заради слабата држава и нивната перманентна закана и континуирана злоупотреба на етнички теми во ситуации кога треба да се зборува за реформи, иднина, подобар живот на граѓаните, и борба против корупција од која тие се преплашени“,
наведуваат од ВМРО-ДПМНЕ во реакцијата.
Од партијата додаваат дека дури и ако Ахмети ја поделел Македонија во 2001 година, денес ќе имал иста или полоша држава со оглед на егзодусот што ѝ се случува, пред сè на Албанците.
„Очигледно српското влијание во ДУИ е непобитно. Голем мерак имаат да бидат како оние српски скороевичи кои се збогатија на грбот на српскиот народ во време на Милошевиќ и ембарга и шверцови и рушење на државниот поредок и општа пљачка. Нашиве српски мафијаши од ДУИ се одраз во огледало на Милошевиќевите криминалци, но огледалото во кое се огледуваат тие е од ‘Алиекспрес’“,
додаваат од владејачката партија.