Основаните сомнежи за такво нешто ги сподели самата Националната агенција за европски образовни програми и мобилност. Велат и дека за случајот се известени Европската комисија, ОЛАФ (Канцеларијата за борба против измами со седиште во Брисел), Делегацијата на ЕУ во Скопје, Јавното обвинителство, Финансиската полиција и Министерството за образование и наука
По спроведена контрола и анализа, Националната агенција за европски програми и мобилност утврдила сериозни пропусти и потенцијална злоупотреба на пари во врска со доделување на средства на Меѓународниот универзитет во Струга. Високообразовната институција, патем, е основана од членови на семејството на струшкиот градоначалник Рамиз Мерко, кој е кадар на сега опозициската ДУИ.
Првично, велат од Националната агенција, спровеле вонредна проверка.
Постапувајќи согласно своите надлежности, по споделена информација со Европската комисија, изврши вонредна проверка (ECHE Check) на исполнувањето на условите за користење на статусот „Erasmus Charter for Higher Education“ (ECHE) од страна на приватна високообразовна институција Меѓународен универзитет во Струга, поради основани сомнежи за евентуални неправилности во примената на принципите и критериумите на Еразмус+ програмата, а овозможени од внатрешно вработени лица во Агенцијата. За некои од нив, Европската Унија веќе констатирала “фамилизација” со корисници во делот на високото образование.
соопштија од Националната агенција.
Во координација со националните тела, одлучено е времено да се одложи евалуацијата во рамки на Евалуационата комисија за високо образование. Одложувањето е до добивање на официјален став од Европската комисија по однос на акредитацискиот статус на универзитетот. Од Националната агенција тврдат дека ова е направено „и покрај притисоците од некои вработени, да се продолжи со доделување на средства за предметниот Универзитет од Струга“.
А, заклучокот од вонредната контрола е дека:
По спроведена контрола и анализа на доставената документација, утврдени се сериозни наоди кои укажуваат на системски пропусти и потенцијални злоупотреби од финансиска и процесна природа, спротивни на ЕУ регулативите и националните закони. Овие дејствија, според првичните наоди, би биле невозможни без внатрешна поддршка од овластени вработени лица во самата Национална агенција. Поради тоа, отворена е внатрешна истрага за евентуална соработка со надворешни корисници од страна на поединци во институцијата.
Како резултат на сериозноста на наодите, Националната агенција официјално ја извести Европската комисија, Канцеларијата за борба против измами (OLAF) во Брисел, Делегацијата на ЕУ во Скопје, Јавното обвинителство, Финансиската полиција и Министерството за образование и наука.
соопштија од Националната агенција.
Од Националната агенција додаваат и дека остануваат доследни во заложбите за „заштита на угледот и интегритетот на европските образовни програми, како и на транспарентно и законито користење на средствата на Европската Унија“. Постапките, велат, се водат професионално и непристрасно.
Меѓународниот универзитет во Струга беше во фокусот на јавноста и пред околу една година. Пред заминување, министерот Јетон Шаќири му акредитираше Факултет за здравствени науки. Набргу по смената на власта, акредитацијата беше повлечена.