„Пропагандата против Европската Унија, која се шири преку домашните медиуми, го злоупотребува идентитетското прашање за да го прикаже интегративниот процес како закана, а не како надеж“, велат од ДУИ
Најновиот извештај на европратеникот Томас Вајц претставува алармантно обвинение за насоката во која се движи Северна Македонија под раководство на коалицијата ВМРО–ЗНАМ–ВЛЕН, реагираат од ДУИ откако Европскиот парламент го усвои Извештајот за напредокот на земјава, но без референциите за македонскиот јазик и идентитет.
Според ДУИ, извештајот го потврдил токму тоа на што интегративците со месеци предупредувале, дека државата се претвора во експериментален терен за најдеструктивните антизападни влијанија на континентот.
„Според извештајот, Северна Македонија станала отворен терен за руската пропаганда, за нетранспарентното економско влијание на Кина и за пренесување на овие влијанија преку политички и медиумски мрежи поврзани со концептот на ‘српскиот свет’. Унгарија и Србија играат улога на посредници, зајакнувајќи го авторитарното присуство и поткопувајќи го евроатлантскиот пат на земјата. Пропагандата против Европската Унија, која се шири преку домашните медиуми, го злоупотребува идентитетското прашање за да го прикаже интегративниот процес како закана, а не како надеж“,
велат од ДУИ.
Оттаму ја критикуваат Владата дека молчела, наместо да понуди сериозен одговор.
„Наместо да го брани институционалниот суверенитет и западната ориентација на државата, Владата дозволува Северна Македонија да тоне во изолација и инструментализација. Ова е резултатот кога власта им се предава на туѓи агенди, додека се занемаруваат најважните партнери на државата – Европската Унија и НАТО. ДУИ со државотворна одговорност алармира: патот што го следи оваа влада е пат на изолација, институционално заробување и поткопување на демократскиот поредок. Иднината на нашите граѓани не лежи во зависноста од авторитарниот Исток, туку во целосната интеграција во европското семејство – со силни институции, транспарентна економија и одржлив мир“,
децидни се од Мала Речица.