Неформалната мрежа на граѓански организации смета дека со назначувањето на посебниот советник на министерот за правда, Андреја Весов за член на Програмскиот совет на Академијата за судии и јавни обвинители се загрозува независноста и законитоста на работењето на Академијата
Повикувајќи се на јавно достапни информации, од неформалната мрежа на граѓански организации кои работат и делуваат во областа на правосудството велат дека Весов не ги исполнува критериумите од Законот за Академијата за судии и јавни обвинители за да биде назначен на оваа позиција, а како дополнително спорен момент ја наведуваат неговата поврзаност со одредена политичка партија (Движење ЗНАМ – За наша Македонија н.з.) и неговата кандидатура за пратеник на последните парламентарни избори
Блупринт-групата за реформи во правосудството реагира на назначувањето на посебниот советник на министерот за правда, Андреја Весов за член на Програмскиот совет на Академијата за судии и јавни обвинители (АСЈО).
Повикувајќи се на јавно достапни информации, од неформалната мрежа на граѓански организации кои работат и делуваат во областа на правосудството сметаат дека Весов не ги исполнува критериумите од Законот за Академијата за судии и јавни обвинители за да биде назначен на оваа позиција.
„Имено, според член 19 од Законот за Академијата за судии и јавни обвинители, како член на Програмскиот совет може да биде избран ‘раководен државен службеник од Министерството за правда со најмалку осум години работен стаж на работи од областа на правосудството, по положен правосуден испит.’ Оттаму, според јавно достапните информации, членот на Програмскиот совет кој е назначен е вработен како посебен советник на министерот за правда, позиција што не се квалификува како раководен државен службеник согласно Законот за административни службеници, туку како ангажман на определено време според Законот за вработените во јавниот сектор“,
се вели во реакцијата на Блупринт-групата за реформи во правосудството.
Како дополнителен момент што според Блупринт-групата сериозно ја нарушува перцепцијата за независност и непристрасност на Академијата, особено во процесот на избор и обука на идни судии и јавни обвинители, е поврзаноста на Весов со одредена политичка партија и неговата кандидатура за пратеник на последните парламентарни избори.
„Академијата треба да биде деполитизирана, професионална институција чија главна мисија е зајакнување на правосудниот кадар и унапредување на владеењето на правото. Програмскиот совет мора да биде составен од професионалци со несомнено искуство и интегритет како би се обезбедило објективен процес на селекција и прием на слушатели на Академијата, ова особено што во изминатите години речиси во секоја генерација на прием на слушатели на Академијата за жал се соочуваме со различни сомнежи или нерегуларности кои го поткопуваат интегритетот на оваа клучна институција“,
велат од Блупринт-групата за реформи во правосудството.
Во таа насока, оттаму апелираат до надлежните институции доследно да ги почитуваат законските одредби при избор и именување на членови во телата на Академијата за да се заштити, како што велат, нејзината независност, стручност и интегритет.
„Само преку транспарентно и законито постапување може да се обезбеди доверба во процесите на обука и селекција на идните судии и јавни обвинители“,
порачуваат од Блупринт групата.
Инаку, како што наведуваат од неформалната мрежа на граѓански организации, а и како што може да се види на веб-страницата на Академијата, Весов за член на Програмскиот совет е назначен на 235. седница на Управниот одбор на АСЈО одржана на 24 јуни.
Инаку, Андреја Весов беше кандидат за пратеник од редовите на Движењето ЗНАМ – За наша Македонија на кумановскиот градоначалник Максим Димитриевски во Изборната едница 3, но не влезе во Собранието.
Од оваа партија е и актуелниот министер за правда Игор Филков.
На фејсбук-профилот на Андреја Весов можат да се видат објави и фотографии од партиски активности на Движењето ЗНАМ, но и содржини поврзани со работата на Министерството за правда.
За потсетување, Блупринт-групата за реформи во правосудството ја сочинуваат следните граѓански организации: Македонско здружение на млади правници (МЗМП), Институт за европска политика (ЕПИ), Институт за човекови права (ИЧП), Коалиција „Сите за правично судење“ (КСПС), Хелсиншки комитет за човекови права и Центарот за правни истражувања и анализи (ЦПИА).