„Не верувам дека некој политички се пресметува со мене и нема зошто. За односот на колегите од Уставниот суд сакам да ги поздравам и да ви кажам дека тие првиот ден кога се донесе пресудата рекоа дека ме поддржуваат, впрочем и судијата Осман Кадриу се појави на прес-конференција и рече дека ова е преседан и дека ме поддржуваат и дека ме охрабруваат да не се откажувам од борбата за мојот статус кој ми се одзеде насилно“, вели Елизабета Дуковска чиј избор за уставен судија неодамна го поништи Управниот суд. Дуковска беше гостинка во „360 степени“ на МРТ 1
360°: Во јавноста, во последниот период, бевте позната како судијка известител за иницијативите за оценување на уставноста на законот за јазици. Знаеме колку внимание предизвика тој случај. Вие, во вашиот реферат, што и јавно беше објавен, предлагавте укинување на одредени одредби од законот за јазици. Оттука, моето прашање би било – дали мислите дека сето ова може да има врска и со случајот со законот за јазици – некој да се обиде да се пресметува, да го одлага процесот со тоа што, еве, вие ќе бидете тргната?
Елизабета Дуковска: Значи, да се пресметува некој со мене – мислам дека не е таква работата и не знам зошто би се пресметувал некој со мене кога јас – доколку би бил тој предлог, бидејќи беше закажана подготвителна седница и не се знае дали истиот предлог би останал… Јас не гласам сама и не одлучувам сама, сите судии гласаат за тој предлог, па може тој предлог да не се прифати и еве да речеме, да остане така. Второ, мислам дека можеби тајмингот на донесување на пресудата е искористен или е направен да личи дека ете сега ќе ја одложиме подготвителната седница којашто и немаше потреба да се одложи. Зошто – затоа што на оваа седница само се слушаат мислењата на експертите кои се повикани, и не се одлучува како што викаат дека мора да се одлучува, со девет судии. Тоа е заклучок на судот поради горливоста на прашањето дека сите девет судии, дека треба да има полн состав на Уставниот суд, а не дека не може да се одлучува и со помалку судии во Уставниот суд. Меѓутоа, во случајов, еве и претходната седница на којашто јас дадов предлог да се одржи подготвителна седница, не се одржа со девет судии. Дали ме разбирате, и во случај и мене да ме разрешиле, немаше потреба од одлагање на подготвителната седница.
360°: Еве уште некои околности што некој може да ги толкува во прилог на тезата дека некој политички се пресметува, а поврзано со законот за јазици. Внатре во судот и самата рековте дека има тројца судии кои најавуваат бојкот на подготвителната, па и на седницата на која ќе се носи одлука за законот за јазици, потоа политички најгласни реално беа од политичката партија ДУИ, меѓу тројцата судии во Вишиот управен суд што постапувале по предметот се Емрије Зубери Алити и Рина Исени, а претседател на Управниот суд е Бурим Сејднини?
Елизабета Дуковска: Значи, јас политика никогаш не сум водела, ниту сум била политичар, нити ме интересира, право да ви кажам. Не верувам дека некој политички се пресметува со мене и нема зошто. За односот на колегите од Уставниот суд сакам да ги поздравам и да ви кажам дека тие првиот ден кога се донесе пресудата рекоа дека ме поддржуваат, впрочем и судијата Осман Кадриу се појави на прес-конференција и рече дека ова е преседан и дека ме поддржуваат и дека ме охрабруваат да не се откажувам од борбата за мојот статус кој ми се одзеде насилно. Бојкотирањето на првата седница нема никаква врска со мене, ние имаме многу добар однос на почитување, па некогаш на дружење, нели, на работа колегите и пијат кафе заедно, меѓутоа некаков притисок од нив или некаква закана или некакво бојкотирање на мене како личност не сум забележала.