Осврнувајќи се кон постоењето на ДУИ во изминатите 23 години, Ахмети рече дека тоа што партијата не доживеала пораз на 18 изборни циклуса поврдува дека е основана на цврсти темели. Рече дека фокусот на партијата бил и ќе остане насочен кон правата на Албанците
Предвремени парламентарни избори заедно со локалните во октомври годинава побара лидерот на Демократската унија за интеграција (ДУИ), Али Ахмети, од централниот настан по повод 23 години од основањето на партијата, кој се одржува денеска во Чаир.
„Политичките партии во ‘Европскиот фронт’ се координираат, во комуникација сме со сите конструктивни политички сили во земјава и мислиме дека на локалните избори ќе бидеме силен фронт за да владееме успешно со општините, но воедно сме силно определени со локалните да имаме предвремени парламентарни избори“,
рече Ахмети.
Осврнувајќи се кон постоењето на ДУИ во изминатите 23 години, Ахмети рече дека тоа што партијата не доживеала пораз на 18 изборни циклуса поврдува дека е основана на цврсти темели. Рече дека фокусот на партијата бил и ќе остане насочен кон правата на Албанците.
„Повеќе од две децении со работа, посветеност, одговорност и политичка зрелост, успеавме да го унапредиме статусот на Албанците со застапеност на секое ниво. Највисоките државни позиции кои со децении беа недостапни за Албанците денес се реалност. Минатата година, покрај претседател на Собранието имавме и албански премиер. Почнавме од нула и стигнавме до премиерот. И нема да застанеме тука“,
порача Ахмети.
Тој упати критики до ВЛЕН, обвинувајќи ги дека во нивно време се случуваат отстранување на Албанците од институциите и неправилности при вработување. Оцени дека ова не е начин преку кој може да се изградат одржливи односи меѓу заедниците и повика да се откажат од ваквиот пристап.
„Добро е да го следат примерот на Арбен Таравари. Кога тој виде како е деградирано албанското прашање и дека сакаат да го закопаат Охридскиот мировен договор, тој ги напушти и добро направи. Добро би направиле и тие што се сега таму. И тие да не бидат дел од овој црн дел од историјата против Албанците во Северна Македонија“,
рече Ахмети.
Меѓуетничките односи, додаде тој, се алфа и омега за мир, стабилност и просперитет на државата.
Првиот интегративец го реафирмираше ставот дека е потребен ветинг, кој би почнал лично од него.