На средбата биле разменети мислења за тековните економски предизвици, а Димитриеска-Кочоска и Славески изразиле заложба за продолжување и натамошно зајакнување на координацијата меѓу Министерството за финансии и Народната банка, во насока на донесување политики што ќе бидат одржливи и во интерес на граѓаните и стопанството
Тековната макроекономска стабилност е приоритет што треба и понатаму да се одржува и унапредува преку добро усогласени и координирани политики – констатираа министерката за финансии Гордана Димитриеска-Кочоска и новоизбраниот гувернер на Народната банка Трајко Славески на денешната средба.
На средбата биле разменети мислења за тековните економски предизвици, а Димитриеска-Кочоска и Славески изразиле заложба за продолжување и натамошно зајакнување на координацијата меѓу Финансии и Народната банка, во насока на донесување политики што ќе бидат одржливи и во интерес на граѓаните и стопанството.
„Димитриеска-Кочоска и Славески изразија подготвеност за континуирана институционална комуникација и соработка, со цел ефикасно справување со тековните и идните економски предизвици“,
информираа од Министерството за финансии.
Министерката за финансии и гувернерот ја истакнале важноста од блиската соработка помеѓу фискалната и монетарната власт за обезбедување предвидлива економска средина, како основен предуслов за побрз економски раст. Било нагласено и значењето на координираниот пристап меѓу сите финансиски регулатори во земјата, со цел понатамошен развој на стабилен, конкурентен и инклузивен финансиски систем, отпорен на надворешни шокови и во функција на долгорочен економски напредок.
Трајко Славески од минатата недела е нов гувернер на Народната банка на РСМ. Тој во петокот даде свечена изјава пред собранискиот претседател Африм Гаши во Охридската сала во парламентот, откако во четвртокот минатата недела законодавниот дом го именува за нов гувернер со 68 гласа „за“ и 16 „против“.