Според него, тоа е најправичниот начин да се зајакне гласот на избирачот и да се обезбеди вистинско претставување во Собранието
Поранешниот министер за надворешни работи и потпретседател на Демократската унија за интеграција (ДУИ), Бујар Османи, денеска на својот фејсбук-профил најави дека за следните парламентарни избори неговата партија ќе предложи отворени листи.
„Граѓаните мора да имаат право да изберат не само партија, туку и кандидатот што ќе ги претставува“,
напиша Османи на Фејсбук.
Според него, тоа е најправичниот начин да се зајакне гласот на избирачот и да се обезбеди вистинско претставување во Собранието.
Оваа изјава на Османи доаѓа откако во земјава се актуализира идејата за една изборна единица, односно по најавите дека претседателката на Либерално-демократската партија (ЛДП) и пратеничка во Собранието, Моника Зајкова, ќе поднесе предлог-закон за воведување една изборна единица и отворени листи.
Премиерот Христијан Мицкоски рече дека пратениците од ВМРО-ДПМНЕ ќе поддржат една изборна единица во која право на глас ќе има и дијаспората.