На прашањето дали како министер за здравство знаел за земањето лекови на реверс од раководството на Онкологија, тој одговори дека тоа бил систем преку кој се обезбедувало терапија. „Загрозување на здравјето може да биде и ситуација во која имате механизам, а не сте посегнале по тој механизам за да обезбедите терапија. Сега Фондот, пред некое време, во таква една ситуација на недостиг на лекови повика, а тоа е целосно противзаконски, компаниите да донираат лекови“, вели Филипче
Сметам дека е добро што има резултат и поддржувам целата постапка да се истера до крај. Ова е коментарот на лидерот на СДСМ, Венко Филипче, за двете обвиненија што ги поднесе ОЈО Скопје за случајот „Онкологија“, а се однесуваат на дела сторени во периодот кога Филипче беше министер за здравство.
Тој во емисијата „360 степени“ на МРТ 1 рече дека секој за кого ќе се утврди вина треба да сноси одговорност согласно законот.
„Тука на површина излегува една друга многу битна работа, а тоа е манипулацијата со која се користеше ВМРО-ДПМНЕ и пратеничката Мизрахи за време на анкетната комисија за Онкологија каде што јас бев обвинет дека сум криел некакви документи. Очигледно е дека се докажа дека не е така. Јас тие документи ги покажав во јавноста. Неправедно бев обвинет и клеветен дека мојата работа како министер во делот на ингеренциите што министерството ги има во контекст на набавката на лекови, јас не сум ја вршел како што треба“,
рече Филипче.
Филипче смета дека неправедно е обвинуван дека бил изземен од случајот и дека немало потреба за такво нешто. Додаде дека бил повикан како сведок и го дал својот исказ.
„Тогаш ги дадов сите документи за кои бев обвинуван дека ги немало и докажав дека мојата работа како министер сум ја вршел согласно ингеренциите кои било кој министер ги има во однос на работењето на клиниката. Јас не можам или било кој министер може да биде свесен или да одговара за делот на стручната работа на било која јавна здравствена институција. Тоа е работа на медицинскиот директор“,
смета тој.
На прашањето дали знаел за земањето лекови на реверс, тој одговори дека тоа бил систем преку кој се обезбедувало терапија.
„Загрозување на здравјето може да биде и ситуација во која имате механизам, а не сте посегнале по тој механизам за да обезбедите терапија. Сега Фондот, пред некое време, во таква една ситуација на недостиг на лекови повика, а тоа е целосно противзаконски, компаниите да донираат лекови… Судски процес има. Нека се расчистат работите, нека се анализира, нека кажат експерти. Еве кажувам, тоа е еден механизам за да се обезбеди терапија во ситуација кога здравството не може, а би требало… Јас во еден период се обидував Законот за јавни набавки да се промени, барем во тој сегмент, затоа што никогаш не можете да предвидите во долг временски период колкав број нови пациенти ќе ви се јават, а вие претходно не сте ги испланирале, нормално поради тоа што немате претстава“,
смета Филипче.
Тој рече дека со сегашната законска регулатива секогаш ќе биде исто и дека затоа мора со измени во Законот за јавни набавки да се направи исклучок во овој дел од здравството. Додаде дека кога тој бил министер одговорот од Министерството за финансии бил дека не може да се менува системски закон само за една работа.
Посочи дека остава истрагата да ги открие даталите, но сепак рече дека во светот на набавка на лекови системот е многу строго регулиран и контролиран.
„Станува збор за едни единствени добавувачи на едни лекови. Тие компании на еден начин имаат монопол и тоа е така секаде во светот. Притоа, цените се строго одредени, државата ги одредува цените на лековите, има механизам како се прави тоа“,
додаде тој.
На прашањето дали чувствува морална одговорност за овој случај, Филипче рече дека како лекар жали за она што се случило и дека треба да се почека разрешницата на судскиот случај за да се разјасни за што точно станувало збор.