Двете нуклеарни сили се во најопасна конфронтација во последните децении. Конфликтот меѓу Индија и Пакистан ескалира утрото, со масовни воздушни и ракетни напади и артилериски престрелки вдолж целата западна граница и во регионот Кашмир. Тие се обвинуваат за директни напади врз воени и цивилни цели, додека бројот на жртви и повредени расте, а меѓународната заедница итно повикува на воздржаност и дијалог
Во раните утрински часови во сабота индиската армија соопшти дека успешно уништила неколку вооружени дронови испратени од Пакистан, особено над воена база во Амритсар, Пенџаб. Пакистан, пак, тврди дека Индија во текот на ноќта испратила ракети кон клучни воени бази, вклучително и една во близина на Исламабад, што довело до нивна контраоперација со удари врз индиски цели во Индија и во индискиот дел на Кашмир. Неутрални извори не можат да ги потврдат овие тврдења, но се известува за експлозии и во двете држави.
Според индиските власти, пакистанските сили нападнале и цивилни објекти, вклучително и храмот Шамбу во Џаму, како и станбени области, што дополнително ја влошува хуманитарната состојба.
Ситуацијата ескалираше по терористичкиот напад во Пахалгам, Кашмир, на 22 април, кога беа убиени 26 туристи, меѓу кои 25 Индијци. Индија го обвини Пакистан за поддршка на нападот и на 7 мај започна со воздушна операција „Синдур“, во која беа погодени девет цели – четири во Пакистан и пет во пакистанскиот дел на Кашмир, за кои Индија тврди дека се скривалишта на забранети терористички организации.
Пакистан одговори со масовни напади со дронови, артилерија и ракети, при што, според официјални индиски извори, најмалку две пакистански беспилотни летала биле соборени над Наушера, а еден пакистански воен авион бил погоден над Патханкот.
Според досегашните информации, во последните неколку дена загинале најмалку 40 лица, главно цивили, а десетици се повредени на двете страни од границата. Во индискиот Кашмир и во областите околу Амритсар, Џаму и Рајастан, жителите сведочат за експлозии, прекини на струја и масовни евакуации.
САД, преку државниот секретар Марко Рубио се обидуваат да посредуваат апелирајќи до министрите на двете земји да избегнат понатамошна ескалација. Рубио ја повтори поддршката на Вашингтон за дијалог и ги осуди терористичките напади барајќи од Пакистан да преземе конкретни мерки против екстремистичките групи.
Ова е најсериозната воена конфронтација меѓу Индија и Пакистан во последните три децении. Двете земји се нуклеарно вооружени, што дополнително ја зголемува загриженоста на меѓународната заедница за можноста од неконтролирана ескалација и хуманитарна катастрофа.
Додека експлозиите и престрелките продолжуваат, а цивилите се во страв и неизвесност, светот со внимание ја следи ситуацијата надевајќи се дека разумот и дипломатијата ќе надвладеат над воените страсти. Засега, двете страни не покажуваат подготвеност за отстапки, а секој нов инцидент може да ја турне Јужна Азија во поширок конфликт со несогледливи последици.