Говорејќи за својата улога во случајот „Адитив“, во кој Обвинителството ја сомничи за оддавање службена тајна на еден од обвинетите, претседателката на ДКСК вели дека комуникацијата со лицето за кое вели дека ѝ е семеен пријател, а кое подоцна било обвинето во случајот, се водела во период пред почетокот на постапката против него. Дополнително, како што вели, разговорите немале никаква поврзаност со „Адитив“
Една недела откако ОЈО ГОКК ја стави на листата на осомничени со кои е проширена истрагата за случајот „Адитив“, претседателката на Државната комисија за спречување на корупцијата (ДКСК), Татјана Димитровска, денеска испрати писмено соопштение до медиумите во кое по првпат се произнесе за случајот.
Говорејќи за својата улога во случајот „Адитив“, во кој Обвинителството ја сомничи за оддавање на службена тајна на еден од обвинетите, Димитровска вели дека комуникацијата со лицето за кое вели дека ѝ е семеен пријател, а кое подоцна било обвинето во случајот, се водела во период пред почетокот на постапката против него.
Дополнително, како што вели Димитровска, разговорите немале никаква поврзаност со случајот „Адитив“.
„Од соопштението на ОЈО ГОКК се согледува дека нашата комуникација траела до декември 2024 година, пред да му е изречена мерка притвор. По оваа мерка кон него, јас престанувам со комуникација. Содржината на комуникацијата се однесува на разговори без никаква поврзаност со случајот ‘Адитив’. Дел од споделените информации се однесуваат на јавни документи чија содржина пред нашата комуникација е објавена во јавност, а останатиот дел е вообичаена пријателска комуникација. За оваа моја комуникација изразувам жалење и укажувам дека е направена без никаква намера да влијаам на постапката или на кој било аспект на истрагата. Ова го тврдам одговорно“,
пишува Димитровска во соопштението доставено до медиумите.
Додава дека во ДКСК во моментов е во тек постапка за проверка на имотната состојба на ова лице и дека според електронската распределба на предметите овој предмет не е распределен на постапување кај неа.
„Согласно утврдените правила, немам никаква можност да влијаам врз текот на постапката или врз исходот. Одлуките на ДКСК се носат колективно, со мнозинство гласови на членовите“,
вели таа.
Првата антикорупционерка вели дека во целост ќе ги почитува мерките на претпазливост кои, на барање на ОЈО ГОКК, ѝ ги определи Основниот кривичен суд Скопје. Додава дека целосно ќе соработува со надлежните правосудни органи во очекување на брза и транспарентна разрешница на настанот.
Димитровска порача дека кредибилитетот и интегритетот на Антикорупциската комисија не смеат да бидат оспорени, особено имајќи ги предвид принципот на пресумпција на невиност и владеење на правото, а и фактот што останатите шест члена од Комисијата немаат поврзаност со делото за кое е осомничена.
„До конечно изјаснување на Обвинителството нема да давам дополнителни јавни изјави, освен ако тоа го наложат околностите, водејќи се од интересот на институционалниот интегритет и транспарентност. Очекувам до тогаш да се почитува интегритетот на ДКСК, мојот и интегритетот на моето семејство“,
пишува претседателката на ДКСК во соопштението испратено до јавноста.
Актуелната претседателка на ДКСК, Татјана Димитровска, минатата недела се најде на листата на осомничени со која Основното јавно обвинителство за гонење организиран криминал и корупција (ОЈО ГОКК) ја прошири истрагата за случајот „Адитив“ кој однесува на криминал во државната ЕСМ тежок 6,5 милиони евра.
Димитровска е осомничена дека му оддавала службени тајни на друг обвинет во случајот.